दक्ष खेलाडी उत्पादन गर्न मैवाखोलाले ५ महिने प्रशिक्षण सञ्चालन गर्ने

ताप्लेजुङ । दक्ष खेलाडी उत्पादन गर्न मैवाखोला गाउँपालिकाले ५ महिने प्रशिक्षण सञ्चालन गर्ने भएको छ । भलिबल र फुटबल खेलमा दक्ष खेलाडी उत्पादन गर्नका लागि पालिकाले बिहीबारदेखि प्रशिक्षण सुरु गर्ने भएको हो । गाउँपालिकाको प्रत्येक मा.वि.बाट यू १४, यू १६ र यू १९ उमेर समूहका विधार्थीहरू प्रशिक्षणमा सहभागी हनेछन् । प्रशिक्षणमा फुटबल तर्फ जिल्ला फुटबल संघ ताप्लेजुङका प्रशिक्षक डी. के. मादेन र भलिबल तर्फ धनकुटाका प्रशिक्षक गणेश तिगेलाले गर्नेछन् । ५ महिना सम्म चल्ने प्रशिक्षणबाट दुवै विद्यामा उत्कृष्ट २४ जना खेलाडी छनौट गरिने पालिकाले जनाएको छ । उत्कृष्ट २४ भित्र पर्ने खेलाडीलाई गाउँपालिकाको केन्द्र साँघुमा प्रशिक्षण प्रदान गरिनेछ ।