ताप्लेजु, असोज १९ गते । नेपाली कांग्रेसको देउवा समूहले ताप्लेजुङका दुईवटा प्रदेशसभा निर्वाचन क्षेत्रसहित नौवटै स्थानीय तहका संयोजक तोकेको छ ।
कांग्रेस जिल्ला संयोजक राज थेबेले दिएको जानकारीअनुसार प्रदेशसभा क्षेत्र ‘क’ को संयोजकमा ललित गुरुङ र क्षेत्र ‘ख’ को संयोजकमा खेमकुमार कार्कीलाई जिम्मेवारी दिइएको छ ।
त्यस्तै फुङलिङ नगरपालिकाको संयोजकमा चोलुङ सेनेहाङ, फक्ताङलुङ गाउँपालिकामा राजेन्द्र अङछबो, सिदिङवा गाउँपालिकामा भीम तामाङ र सिरिजङ्घा गाउँपालिकामा लक्ष्मी थेबेलाई संयोजक तोकिएको छ ।
यसैगरी मेरिङदेन गाउँपालिकाको संयोजकमा दिलकुमार केदेम, मैवाखोला गाउँपालिकामा दिपेन लिम्बू, आठराई त्रिवेणी गाउँपालिकामा सनबहादुर लिम्बू, मिक्वाखोला गाउँपालिकामा लालबहादुर लिम्बू र पाथीभरा याङवरक गाउँपालिकामा नेत्रबहादुर कार्कीलाई जिम्मेवारी दिइएको जिल्ला संयोजक थेबेले जानकारी दिनुभयो ।
प्रदेशसभा क्षेत्र तथा स्थानीय तहमा पार्टीको संगठनलाई थप व्यवस्थित, सक्रिय र सुदृढ बनाउने उद्देश्यले संयोजक तोकिएको कांग्रेसले जनाएको छ । नयाँ जिम्मेवारीसँगै जिल्लामा पार्टीका संगठनात्मक गतिविधि थप प्रभावकारी हुने अपेक्षा गरिएको छ ।
जिल्ला संयोजक थेबेका अनुसार कांग्रेसले संगठन विस्तार र अधिवेशनलाई समेत निरन्तरता दिएको छ । उहाँका अनुसार सोमबार ताप्लेजुङका २७ वटा वडामा अधिवेशन भइरहेको छ ।
स्थानीय तह तथा प्रदेशसभा क्षेत्रमा संयोजक तोकेसँगै पार्टीको तल्लो तहसम्मको संगठन परिचालन, सदस्यता विस्तार तथा आगामी राजनीतिक गतिविधिलाई व्यवस्थित बनाउने तयारी गरिएको कांग्रेसले जनाएको छ ।
प्रतिक्रिया