ताप्लेजुङ, असोज १६ गते । कञ्चनजंघा सामुदायिक बहुमुखी सहकारी संस्था लिमिटेडले आर्थिक वर्ष २०८२/८३ मा १३ लाख ९५ हजार १३६ रुपियाँ खुद नाफा आर्जन गरेको छ ।
संस्थाको २३औँ वार्षिक साधारण सभा तथा रजत जयन्तीका अवसरमा आयोजित कार्यक्रममा प्रस्तुत विवरणअनुसार उक्त आर्थिक वर्षमा संस्थाको कुल आम्दानी एक करोड ५४ लाख ९९ हजार ९४० रुपियाँ रहेको छ । यस्तै, संस्थाको कुल खर्च एक करोड ३९ लाख ४९ हजार ७८८ रुपियाँ रहेको जनाइएको छ ।
संस्थाका अध्यक्ष चन्द्र यवागुले आर्थिक गतिविधि र सदस्यको सहभागिता बढ्दै गएको बताउनुभयो । उहाँका अनुसार आर्थिक वर्ष २०८२/८३ सम्म संस्थामा दुई हजार ७९५ जना शेयर सदस्य रहेका छन् ।
रजत जयन्तीको अवसरमा संस्थाले बाल बचतकर्तामध्ये माध्यमिक शिक्षा परीक्षा (एसइई) २०८२ मा उत्कृष्ट अङ्क ल्याउने पाँच जना विद्यार्थीलाई सम्मान गरेको छ । सम्मानित हुनेमा दुई छात्र, दुई छात्रा र प्राविधिक धारतर्फका एक जना विद्यार्थी रहेका छन् ।
जसमा स्नेहा तामाङ, साइन्सा साम्सोहाङ, निसुङहाङ सेन्दाङ, मोविचन यवागु र युनिक अधिकारी रहनुभएको छ । उहाँहरूलाई नगद एक हजार रुपियाँ, सम्मानपत्र र ताप्लेजुङको परिचय दिने पुस्तक प्रदान गरिएको अध्यक्ष यवागुले जानकारी दिनुभयो ।
यसैगरी साधारण सभाको अवसरमा चार जना ज्येष्ठ नागरिकलाई पनि सम्मान गरिएको छ । सिरिजङ्घा गाउँपालिकाकी लोकमाया यवागु, पाथीभरा याङवरकका चन्द्रप्रकाश मेन्याङबो, फुङलिङ नगरपालिकाकी चन्द्रमाया गुरुङ र छत्रबहादुर गुरुङलाई नगद एक हजार रुपियाँ, सम्मानपत्र र दोसल्लासहित सम्मान गरिएको हो ।
संस्थाले उत्कृष्ट बाल सदस्यतर्फ सिरिजङ्घाकी प्रनिषा ढकाल र पाथीभरा याङवरककी लिजा ढकाललाई सम्मान गरेको छ । उत्कृष्ट बाल बचतकर्ताका रूपमा फुङलिङ–४ की ईमा राई र लाबिनहाङ नाल्बो सम्मानित हुनुभएको छ ।
त्यस्तै, उत्कृष्ट बचत समूहतर्फ पाथीभरा याङवरकको सुनखानी महिला समूह र उत्कृष्ट कृषक सदस्यतर्फ धनकुमारी मादेनलाई नगद एक हजार रुपियाँ र सम्मानपत्रसहित सम्मान गरिएको संस्थाले जनाएको छ ।
कार्यक्रमका प्रमुख अतिथि कोशी प्रदेश सभा सदस्य तथा पूर्वमन्त्री तिलकुमार मेन्याङबोले सहकारीले सदस्यको आर्थिक तथा सामाजिक विकासमा योगदान पु¥याउनुपर्ने बताउनुभयो । उहाँले सहकारी संस्थाहरूले सदस्य केन्द्रित भएर पारदर्शी र प्रभावकारी ढङ्गले सेवा प्रवाह गर्नुपर्नेमा जोड दिनुभयो ।
रजत जयन्तीका अवसरमा संस्थाले आफ्ना सदस्य, बचतकर्ता, ज्येष्ठ नागरिक तथा विद्यार्थीलाई सम्मान गर्दै सहकारीसँग जोडिएका विभिन्न क्षेत्रमा योगदान पु¥याउने सदस्यलाई प्रोत्साहन गरेको हो ।
प्रतिक्रिया