ताप्लेजुङ, असोज २ गते । ताप्लेजुङको पाथीभरा याङवरक गाउँपालिका–२ थेचम्बुमा छारे रोगसम्बन्धी निःशुल्क स्वास्थ्य शिविर सञ्चालन हुने भएको छ । नेपाल छारे रोग संघ काठमाडौँ र पाथीभरा याङवरक गाउँपालिकाको संयुक्त आयोजनामा आगामी असोज १० गते शनिबार शिविर सञ्चालन हुने भएको हो ।
थेचम्बु स्वास्थ्य चौकीमा बिहान ७ बजेदेखि दिउँसो १२ बजेसम्म सञ्चालन हुने शिविरमा छारे रोगसम्बन्धी स्वास्थ्य परीक्षण तथा परामर्श सेवा उपलब्ध गराइने पाथीभरा याङवरक गाउँपालिकाका अध्यक्ष केशर सुब्बाले जानकारी दिनुभयो । उहाँका अनुसार शिविरमा सहभागी हुने बिरामीलाई आवश्यक औषधिसमेत निःशुल्क वितरण गरिने छ ।
शिविरमा छारे रोगको समस्या भएका तथा स्वास्थ्य परीक्षण र परामर्श आवश्यक पर्ने व्यक्तिले शिविरबाट सेवा लिन सक्नेछन् । शिविरमा सहभागी हुन इच्छुकले फोनमार्फत नाम टिपाउन सक्ने व्यवस्था पनि गरिएको छ ।
छारे रोगसम्बन्धी समस्या भएका व्यक्तिलाई समयमै स्वास्थ्य परीक्षण तथा उपचारमा पहुँच पु¥याउने उद्देश्यले शिविर आयोजना गरिएको गाउँपालिकाले जनाएको छ । ग्रामीण क्षेत्रका नागरिकलाई स्थानीयस्तरमै विशेषज्ञ स्वास्थ्य सेवा उपलब्ध गराउने उद्देश्यले शिविर सञ्चालन गर्न लागिएको पालिका अध्यक्ष सुब्बाको भनाई छ ।
प्रतिक्रिया