ताप्लेजुङ, भदौ १६ गते । सलहेश युवा क्लब सिराहा अन्तर्राष्ट्रिय आमन्त्रण चौथो ताप्लेजुङ गोल्डकप फुटबल प्रतियोगिताको फाइनलमा प्रवेश गरेको छ । मङ्गलबार भएको पहिलो सेमिफाइनल खेलमा भारतको जर्जियन युनाइटेड फुटबल क्लबलाई २–० गोल अन्तरले पछि पार्दै साविक विजेता सिराहा फाइनलमा प्रवेश गरोको हो ।
गत भदौ १२ गतेदेखि जारी प्रतियोगितामा आइतबार भएको तेस्रो क्वाटर फाइनल खेलमा सातदोबाटो फुटबल क्लब ललितपुरलाई पराजित गर्दै सलहेश सेमिफाइनलमा प्रवेश गरेको थियो । यस्तै उद्घाटन खेलमा आयोजक–११ ताप्लेजुङलाई पराजित गर्दै भारतले सेमिफाइनलको यात्रा तयार गरेको थियो ।
त्यस्तै बुधबार दोस्रो सेमिफाइनल खेलमा झापा–११ र पाँचथरको फिदिम स्पार्टिङ क्लबबिच प्रतिस्पर्धा हुने भएको छ । सोमबार भएको अन्तिम क्वाटर फाइनल खेलमा नेपाल पुलिस क्लबलाई पराजित गर्दै झापा–११ ले सेमिफाइनलमा स्थान सुरक्षित गरेको हो । यस्तै शनिबार भएको दोस्रो क्वाटरफाइनल खेलमा चित्लाङ फुटबल क्लबलाई ट्राइबेकरमा पराजित गर्दै पाँचथरले सेमिफाइनलको यात्रा तय गरेको थियो ।
भानुजन माध्यमिक विद्यालयको खेलमैदानमा सञ्चालन भइरहेका प्रतियोगिताको फाइनल खेल भदौ १९ गते हुने आयोजक लाखेजात्रा सञ्चालन समितिको अध्यक्ष सागर मादेनले बताउनुभयो । खेलमा भारत सहित आठ वटा टिमको सहभागिता रहेको थियो ।
लाखेजात्राको अवसरमा हरेक वर्ष सञ्चालन हुँदै आइरहेको प्रतियोगिता २०८० सालदेखि ताप्लेजुङ गोल्डकपको नामबाट सञ्चालन हुँदै आएको छ । प्रतियोगिताको विजेताले नगद सात लाख दुई हजार ८३ रुपियाँ र उपविजेताले तीन लाख ५२ हजार ८३ रुपियाँ सहित ट्रफी, मेडल र प्रमाण पत्र प्राप्त गर्नेछन् ।
प्रतियोगिताको सर्वोत्कृष्ट खेलाडीलाई बजाज कम्पनीको मोटरसाइकल उपलब्ध गराइने सञ्चालन समितिका कोषाध्यक्ष दावा शेर्पाले बताउनुभयो । योसँगै विभिन्न विधाका उत्कृष्ट खेलाडी र हरेक दिनको म्यान अफ दि म्याच खेलाडीलाईसमेत नगद पुरस्कार ट्रफी, मेडल र प्रमाणपत्रको व्यवस्था गरिएको छ ।
यस्तै, भाग्यशाली एक जना दर्शकले स्कुटर उपहार पाउने छन् ।
प्रतिक्रिया