ताप्लेजुङ, साउन १३ गते । ताप्लेजुङको पाथीभरा याङवरक गाउँपालिकाले सञ्चालन गरेको एकीकृत घुम्ती सेवा शिविरबाट ६ सय ८७ जना नागरिक प्रत्यक्ष लाभान्वित भएका छन् । गाउँपालिकाले वडा नं. २ बाहेक अन्य पाँच वडामा पुगेर सामाजिक सुरक्षा तथा स्वास्थ्यसम्बन्धी सेवा प्रवाह गरेको हो ।
गाउँपालिकाका निमित्त प्रमुख प्रशासकीय अधिकृत इक्साहाङ सुब्बाका अनुसार साउन ६ देखि १२ गतेसम्म सञ्चालन गरिएको शिविरमा ४ सय ५२ जनाले सामाजिक सुरक्षा भत्ता सम्बन्धी सेवा प्राप्त गरेका छन् भने ६० वर्षमाथिका २ सय ३५ जना ज्येष्ठ नागरिकको निःशुल्क स्वास्थ्य परीक्षण गरिएको छ ।
शिविर अन्तर्गत वडा नं. १ नाङखोल्याङमा १ सय २२ जनाले सामाजिक सुरक्षा भत्ता सेवा र ६४ जनाले स्वास्थ्य परीक्षण सेवा लिएका छन् । वडा नं. ३ तिरिङ्गेमा ८७ जनाले सामाजिक सुरक्षा सेवा तथा ३९ जनाले स्वास्थ्य परीक्षण गराएका छन् । त्यसैगरी वडा नं. ४ डुम्रिसेमा ७१ जनाले सामाजिक सुरक्षा सेवा र ४२ जनाले स्वास्थ्य परीक्षण, वडा नं. ५ चाक्सिबोटेमा ४७ जनाले सामाजिक सुरक्षा सेवा तथा २८ जनाले स्वास्थ्य परीक्षण र वडा नं. ६ थुम्बेदिनमा १ सय २५ जनाले सामाजिक सुरक्षा सेवा तथा ६२ जनाले स्वास्थ्य परीक्षण सेवा प्राप्त गरेका छन् ।
गाउँपालिकाले साउन ६ गते वडा नं. १, ७ गते वडा नं. ३, ८ गते वडा नं. ४, ११ गते वडा नं. ५ र १२ गते वडा नं. ६ मा शिविर सञ्चालन गरेको हो । दुर्गम बस्तीका नागरिकलाई गाउँपालिकाको केन्द्रसम्म धाउनुपर्ने बाध्यता हटाउँदै स्थानीय स्तरमै सेवा उपलब्ध गराउने उद्देश्यले हरेक वर्ष एकीकृत घुम्ती सेवा शिविर सञ्चालन गरिँदै आएको पालिका अध्यक्ष केशरकुमार सुब्बाले बताउनुभयो ।
प्रतिक्रिया