ताप्लेजुङ, साउन ५ गते । ताप्लेजुङमा घरेलु तथा साना उद्योग कार्यालयमार्फत एक वर्षमा दुई सय बढीले रोजगारीका लागि तालिम पाएका छन् । आर्थिक वर्ष २०८२–८३ मा घरेलु तथा साना उद्योग कार्यालयमार्फत दुई सय ३६ जनाले रोजगारीका लागि तालिम पाएका हुन् ।
जसमा एक सय ४० जना पुरुष र ९६ महिला रहेको घरेलु तथा साना उद्योग कार्यालय ताप्लेजुङका सूचना अधिकारी नवीन भट्टराईले जानकारी दिनुभयो । उहाँका अनुसार उक्त अवधिमा ३१ पुरुष र २९ महिला गरी जम्मा ६० जना नयाँ उद्यमी बनेका छन् ।
कार्यालयले आव २०८२–८३ मा ग्राफिक डिजाइन, वेभ डेभलपमेन्ट, ब्युटी पार्लर, ट्रयाक सुट सिलाई, एडभान्स सिलाई कटाई र वरिष्ठता तालिम एक–एक वटा तथा उद्यमशीलता विकास तालिम दुईवटा सञ्चालन गरेको घरेलु तथा साना उद्योग कार्यालय प्रमुख तथा उद्योग अधिकृत लक्ष्मी सुहाङले बताउनुभयो । उहाँका अनुसार उक्त अवधिमा १७ लाख ५२ हजार ६ सय ७ रुपियाँ राजश्व सङ्कलन भएको छ ।
जसमा रजिष्ट्रेशन शुल्क वापत १६ लाख ९४ हजार ४०७ रुपियाँ र अन्य प्रशासनिक सेवा शुल्क वापत ५८ हजार २०० रुपियाँ सङ्कलन गरेको छ । यस्तै ५९ वटा निजी फर्म र एक कम्पनी गरी ६० वटा उद्योग दर्ता भएको छ ।
प्रतिक्रिया