ताप्लेजुङमा बढ्यो धान रोपाइँ

ताप्लेजुङ, असार १६ गते । ताप्लेजुङमा यस वर्ष धान रोपाइँ वृद्धि भएको छ । गत वर्षको तुलनामा यस वर्ष धान रोपाइँ वृद्धि भएको हो ।

गत वर्षको यही अवधिमा १७.८५ प्रतिशत मात्र रोपाइँ भएको थियो भने यस वर्षको हालसम्ममा करिब २५ प्रतिशत बढी रोपाइँ भएको कृषि ज्ञान केन्द्र ताप्लेजुङका बाली विकास अधिकृत मुना न्यौपानेले जानकारी दिनुभयो ।

उहाँका अनुसार यस वर्ष गत वर्षको तुलनामा बढी वर्षा भएकाले धेरै रोपाइ हुन सफल भएको हो । विगतका केही वर्षको तुलनामा यस वर्ष समय अगावै वर्षा भएकाले रोपाइँँ पनि धेरै भएको केन्द्रका निमित्त कार्यालय प्रमुख कृषि प्रसार अधिकृत विजय श्रेष्ठले बताउनुभयो । गत वर्ष समयमै वर्षा नहुँदा कृषकले समयमै धान रोप्न पाएका थिएनन् । जसका कारण कम मात्रामा धान रोपाइँ भएको केन्द्रले जनाएको छ ।

यसैबीच राष्ट्रिय कृषक समुह महासङ्घ नेपालले ताप्लेजुङमा २३ औँ धान दिवस मनाएको छ । कृषि ज्ञान केन्द्र ताप्लेजुङ र फुङलिङ नगरपालिकाको आर्थिक सहयोगमा धान दिवस मनाएको हो ।

फुङलिङ नगरपालिकास्थित दोखु क्षेत्रको लक्ष्मीटारमा धान दिवस मनाइएको महासङ्घका अध्यक्ष कृष्णकुमार बस्नेतले बताउनुभयो । दिवसमा स्थानीय कृषकसहित फुङलिङ नगरपालिकाका उपप्रमुख भीमादेवी ओझा, प्रमुख जिल्ला अधिकारी शिवराज सेढाईं विभिन्न राजनीतिक दलका प्रमुखहरू, कार्यलयका प्रमुखहरूको उपस्थिति रहेको थियो । उपस्थित सबैले धान रोपेर धान दिवस मनाएको महासङ्घले जनाएको छ ।