ताप्लेजुङ, बैशाख १९ गते । ताप्लेजुङको मेरिङदेन गाउँपालिकाले कुकुर तथा बिरालो बन्ध्याकरण शिविर शुरु गरेको छ । पालिकाले शुक्रबारबाट शिविर सुरु गरेको हो ।
शुक्रबार वडा नं.–१ थिङ्लाबू, २ सान्थाक्रा र ३ खाम्लुङको लागि पालिकाको केन्द्र सान्थाक्रामा शिविर सम्पन्न भएको गाउँपालिका अध्यक्ष युकहाङ विर हाङ्गाम (डम्बर) ले जानकारी दिनुभयो । उहाँका अनुसार शिविर पशु सेवा शाखा अन्तरगत सञ्चालन गरिएको हो ।
शिविरमा ५८ वटा कुकुर तथा बिरालोको बन्ध्याकरण गरिएको पशु सेवा शाखाले जनाएको छ । गाउँपालिकाले आवारा तथा घरपालुवा जनावरको अनियन्त्रित प्रजनन नियन्त्रण गर्दै रेविज जस्ता जोखिमयुक्त रोगको रोकथाम गर्ने उद्देश्यले यो कार्यक्रम सञ्चालन गरेको जनाएको छ ।
शिविरमा अनुभवी प्राविधिक टोलीले जनावरहरूको स्वास्थ्य परीक्षण गरी सुरक्षित र व्यवस्थित रूपमा बन्ध्याकरण सेवा प्रदान गरिएको अध्यक्ष हाङ्गामको भनाई छ । पशु सेवा शाखाका अनुसार यस्ता कार्यक्रमले जनावरको सङ्ख्या नियन्त्रण गर्न सहयोग पु¥याउने मात्र नभई मानव स्वास्थ्यमा पर्ने सम्भावित जोखिम न्यूनीकरणमा समेत महत्वपूर्ण भूमिका खेल्ने अपेक्षा गरिएको छ ।
गाउँपालिकाले शनिबार ४ र ५ साथै आइतबार ६ नं. वडामा शिविर सञ्चालन गर्ने जानकारी दिएको छ ।
प्रतिक्रिया