ताप्लेजुङ, फागुन २२ गते । ताप्लेजुङमा सबै मतदान केन्द्रका मतपेटिका सङ्कलन भइसकेको छ । जिल्लाको हिमाली क्षेत्र चार मतदान केन्द्रको मतपेटिका हेलिकप्टर मार्फत ल्याइए सँगै एक सय २७ ओटै मतदान केन्द्रबाट मतपेटीका सङ्कलन भइसकेको हो ।
मुख्य निर्वाचन अधिकृत विकास श्रेष्ठका अनुसार आज बिहान करिब तीन बजेसम्ममा चार ओटा केन्द्रका बाहेक सबै ठाउँका मतपेटिका आइसकेको थियो । उहाँका अनुसार जिल्लाको उच्च हिमाली बस्तीका चार स्थानका मतपेटिका पनि हेलिकप्टर मार्फत सङ्कलन गरिएको हो ।
हेलिकप्टर मार्फत फक्ताङलुङ गाउँपालिकाका–६ घुन्सा आधारभुत विद्यालय र ग्याब्ला प्राथमिक विद्यालयका मतदान केन्द्र साथै फक्ताङलुङ–७ ओलाङचुङगोला र जिल्लाको सबैभन्दा उच्च हिमाली बस्ती याङमा आधारभुत विद्यालयको मतपेटिका सङ्कलन भएको हो । ती चार ओटा स्थान यातायातको पहुँचदेखि टाढा रहेकोले मतपेटिका सङ्कलनमा ढिलाइ भएको हो । चार स्थानका मतपेटिका सङ्कलनको लागि हेलिकप्टर हिजो नै ताप्लेजुङ आएको थियो ।
साँझ पाँच बजेपछि हेलिकप्टर प्रस्थान गर्ने तयारी गरेपनि अकस्मात् मौसममा आएको परिवर्तनका कारण सम्भव हुन नसकेको प्रमुख जिल्ला अधिकारी शिवराज सेढाइँले जानकारी दिनुभयो । उहाँका अनुसार आज बिहान हेलिकप्टर मतपेटिका ढुवानीका लागि प्रस्थान गरी सङ्कलन गरेर ल्याइएको हो ।
यो सँगै अब सर्वदलीय बैठक बसेर मतगणनाको कार्य सुरु गरिने मुख्य निर्वाचन अधिकृत श्रेष्ठले जानकारी दिनुभयो ।
प्रतिक्रिया