ताप्लेजुङ, माघ २० गते । आङबुहाङ वंश परिवारभित्र पछिल्लो समय उत्पन्न भएको विवाद, असमझदारी र अन्योलताको विषयमा पारस्परिक छलफल तथा खुला अन्तरक्रिया कार्यक्रम सोमबार सम्पन्न भएको छ। आङबुहाङ वंश प्रतिष्ठान मोरङको आयोजनामा चाँगे माध्यमिक विद्यालयको सभाहलमा उक्त बृहत् छलफल तथा अन्तरक्रिया कार्यक्रम आयोजना गरिएको हो ।
मुल भूमी, थातथलो नेसुन (चाँगे-चेङ्या), हाङपाङ र सोबुवामा बसोबास गर्ने आङबुहाङ वंश परिवारका दाजुभाइहरूबीच वंश, इतिहास र अस्तित्वसँग सम्बन्धित विषयमा उठेका विभिन्न प्रश्नहरूमा साझा धारणा बनाउन कार्यक्रम आयोजना गरिएको आयोजकले जनाएको छ ।
प्रतिष्ठानको तदर्थ समिति संयोजक खगेन्द्र आङबुहाङको अगुवाइमा सम्पन्न कार्यक्रममा संयोजक आङबुहाङले राजा थिन्दोलुङ खो याहाङ पछिका १३ औँ पुस्ता नामाहाङका सन्ततीका रूपमा आङबुहाङ वंश परिवारको गौरवशाली इतिहास, पुर्खाहरूको वीरता र अभूतपूर्व योगदानबाट प्राप्त ऐतिहासिक विरासतलाई जोगाउनु सबैको साझा दायित्व भएको ताउनुभयो । उहाँले समयक्रमसँगै विभिन्न भूगोलमा छरिएर बसोबास गरिरहेका आङबुहाङ वंश दाजुभाइबीच एकता, भाइचारा र सद्भाव अझ मजबुत बनाउनुपर्ने आवश्यकता औँल्याउनुभयो ।
संयोजक आङबुहाङले विगत लामो समयदेखि विश्वास गरिएका केही अग्रज व्यक्तिहरूको गलत सोच, अकर्मण्यता र असन्तुलित कदमका कारण सम्पूर्ण आङबुहाङ वंश परिवारमा अन्योल र विवाद सिर्जना भएकोप्रति दुःख व्यक्त गर्नुभयो । वंशावली तथा इतिहास लेखन तथ्य र प्रमाणको आधारमा हुनुपर्ने उल्लेख गर्दै अप्रमाणित विषयहरूमा छलफल, परामर्श र सहमतिबाट मात्र निष्कर्षमा पुग्नुपर्ने उहाँको भनाइ थियो । इतिहासलाई मनोमानी ढंगले तोडमोड गर्नु र वंशको इतिहास बिगार्नु क्षम्य नहुने पनि उहाँले स्पष्ट पर्नुभयो ।
कार्यक्रममा वंशावली लेखन र प्रकाशनका सन्दर्भमा विक्रम संवत् २०८२ भदौ २८ गते धरानमा बहुसंख्यक वंश दाजुभाइलाई बहिष्कार गरी गरिएको कथित गतिविधि र सोही कदमलाई अनुमोदन गर्न विक्रम संवत् २०८२ पौष २३ गते गरिएको भनिएको साधारण सभाप्रति समेत गम्भीर असन्तुष्टि व्यक्त गरियो । ती गतिविधिले वंशभित्रको एकता, सद्भाव, आन्तरिक लोकतन्त्र र न्यूनतम विधि–प्रक्रियाको समेत उल्लंघन गरेको सहभागीहरूको धारणा थियो ।
थिन्दोलुङ खो याहाङ वंशज संघ, केन्द्रीय समितीले समेत उक्त कदमलाई मान्यता नदिएको स्पष्ट भइसकेको अवस्थामा वंशभित्र उत्पन्न विवाद समाधानका लागि खुला छलफल आवश्यक ठानी कार्यक्रम आयोजना गरिएको आयोजकको भनाइ छ ।
प्रतिक्रिया