ताप्लेजुङ, मंसिर १६ गते । जिल्ला समन्वय समितिका प्रमुख छिरिङ लामा एमालेमा प्रवेश गर्नुभएको छ । मङ्गलबार दिउँसो एमाले पार्टी कार्यालय पुग्नुभएका उहाँलाई पोलिटब्युरो सदस्य तिलकुमार मेन्याङ्बोलगायतले खादा, माला लगाएर पार्टीमा स्वागत गर्नुभएको हो ।
लामासँगै मेरिङदेन गाउँपालिका पूर्व प्रवक्ता सूर्य बराइली र अन्य कार्यकर्ता पनि पार्टीमा फर्किनुभएको राष्ट्रिय जनसांस्कृतिक महासङ्घ ताप्लेजुङका अध्यक्ष हेमराज निरौलाले जानकारी दिनुभएको छ । नेकपा एसबाट जिल्ला समन्वय समिति प्रमुख हुनुभएका लामा एस र माओवादी केन्द्र समेतले नेपाली कम्युनिष्ट पार्टी बनाएपछि एमालेमा फर्किनुभएको हो ।
उहाँले विद्यार्थी जीवनदेखि राजनीतिमा सक्रिय रहेको बताउँनुभयो । नेकपा एमाले ताप्लेजुङको घर फर्क राष्ट्रिय अभियानलाई सम्बोधन गर्दै उहाँले भन्नुभयो, “अनेरास्ववियु, तत्कालीन माले हुँदै यसअघि पनि एमालेमा रहेको र समय परिस्थितिअनुसार जेनजी आन्दोलनपछि राष्ट्रियता, लोकतन्त्र प्रतिको चिन्तन एमालेमा पाएकाले यसैमा फर्किएका हुँ,” कार्यक्रममा उहाँले भन्नुभयो ।
उहाँले आफूले एमालेमा कुनै पद नमागेको दाबी समेत गर्नुभयो । लामा एमाले विभाजनपछि नेकपा एसको जिल्ला अध्यक्षसमेत हुनुभएको थियो ।
प्रतिक्रिया