मन्त्र ब्याण्ड ताप्लेजुङ आउने

ताप्लेजुङ, भदौ २० गते । ताप्लेजुङमा मन्त्र ब्याण्ड आउने भएको छ । फुङलिङ नगरपालिका–४ भानु जन माध्यमिक विद्यालयको प्राङ्गणमा हुने लाइभ कन्सर्टका लागि भारत दार्जिलिङको ब्याण्ड ताप्लेजुङ आउने भएको हो ।

शुक्रबार पत्रकार सम्मेलन मार्फत ङावोरक सङ्जुम्बो फुङ्लेङ्को आयोजनामा सामुदायिक भवन निर्माणका लागि उक्त लाइभ कन्सर्ट गर्न लागिएको कार्यक्रम संयोजक तारानाथ बरालले जानकारी दिनुभयो । उहाँका अनुसार फुङलिङ नगरपालिका–४ माछापोखरी टोलमा भवन निर्माणको कार्य सुरु गरिएको छ ।

करिब एक करोड ५० लाख रुपियाँमा निर्माण कार्य सकिने उक्त भवनको जग्गा खरिदका लागि १२ लाख आवश्यक परेको कोषध्यक्ष राजदिप मादेनले बताउँनुभयो । अहिले जग्गा धनीलाई करिब एक लाख रुपियाँ प्रदान गरि भवनको निर्माण कार्य धमाधम भइरहेको मादेनको भनाई छ ।

लाइभ कन्सर्ट आगामी असोज २१ गते हुने भएको छ । कन्सर्टमा मन्त्र व्याण्ड सँगै ताप्लेजुङकै मातृभूमि ब्याण्डको पनि प्रस्तुती रहने ङावोरक सङ्जुम्बो फुङ्लेङले जनाएको छ । उक्त कन्सर्टका लागि टिकट दर न्यूनतम ५०० रुपियाँ निर्धारण गरिएको छ ।

कार्यक्रम सम्पन्न गर्नका लागि १५ लाख ५०० हजार रुपियाँ खर्च हुने अनुमान गरिएको छ ।