ताप्लेजुङ । ताप्लेजुङको फुङलिङ नगरपालिकामा भएको आगलागीबाट करिब १५ लाख रुपैयाँका क्षति भएको छ । मंगलबार अपराह्न फुङलिङ ३ का स्थानीय हर्क बहादुर पालुङवाको घर आगलागी हुँदा सो रकम बराबरको क्षति भएको जिल्ला प्रहरी कार्यालय ताप्लेजुङ प्रहरी निरीक्षक तथा सूचना अधिकारी कमल कुमार लुङ्गेली जानकारी दिनुभयो ।
उहाँका अनुसार पालुङवाको ढुङ्गा, माटोले बनेको जस्ताको पाताले छाएको ३ तले घर जले र नष्ट भएको हो । आगलागीबाट नब्बे हजार रुपैयाँ नगद, खाद्यान्न, लत्ताकपडा, भाँडावर्तन, घरमा रहेको आवश्यक कागजात लगायतका सामाग्री जलेर नष्ट भएको प्रहरी भनाई छ । आगलागीबाटै गोठ बाँधेका एउटा भैँसी समेत मरेको छ ।
आगो गोठबाट सल्किएर घरमा प्रवेश गरेको स्थानीयको भनाई छ । करिब ३ बजे आगलागी सुरु भएको र सोही वडाको अस्थायी प्रहरी चौकी सिम्लेबाट खटेको प्रहरीको टोली, स्थानीय लगायतको पहलमा करिब १ घण्टापछि नियन्त्रणमा आएको जिल्ला प्रहरी कार्यालय ताप्लेजुङले जनाएको छ ।
सुक्खायाम सुरु भएसँगै आगलागीका घटना समेत जिल्लामा तिव्रता पाउँदै छन् । केही दिन अगाडिमात्रै फुङलिङ नगरपालिका र पाथीभरा याङवरक गाउँपालिका लगायतको क्षेत्रमा वनमा लागेको आगोले घरमा क्षति पु¥याएको छ ।
प्रतिक्रिया