फुङ्लिङमा आजबाट सुरु भयो उपमेयर कप महिला फुटबल प्रतियोगिता 

ताप्लेजुङ । ताप्लेजुङको फुङ्लिङ नगरपालिकामा आजदेखि दोस्रो उपमेयर कप महिला फुटबल प्रतियोगिता सुरु भएको छ । अन्तर्राष्ट्रिय नारी दिवसको अवसर पारेर आयोजना गरिएको अन्तरपालिकास्तरीय महिला फुटबल प्रतियोगिताको उद्घाटन आज भएको हो । 

कोशी प्रदेशका पूर्व स्वास्थ्य मन्त्री निर्मला तावाको प्रमुख आतिथ्यतामा भएको उद्घाटन खेलमा आयोजक फुङ्लिङ नगरपालिकाले सिदिङवा गाउँपालिकालाई पराजित गरेको छ । फुङ्लिङ नगरपालिकाले सिदिङवा गाउँपालिकालाई १-० अन्तरले पराजित गरेको हो । यस्तै दोस्रो खेलमा भोलि बिहान मेरिङ्देन गाउँपालिका र फक्ताङ्लुङ गाउँपालिकाबीच हुनेछ । 

भोलि नै तेस्रो खेल पाथीभरा याङ्वरक र मिक्वाखोला गाउँपालिका तथा चौथो खेल आठराई त्रिवेणी र सिरिजङ्घा गाउँपालिकाबिच हुने भएको छ । सेमिफाइनल चरणका खेलहरू आइतबार हुने आयोजकले जानकारी दिएको छ । फागुन २८ गते सोमबार फाइनल खेलसँगै प्रतियोगिता सम्पन्न हुनेछ । खेल भानु जन माध्यमिक विद्यालयको खेलमैदानमा सञ्चालन भइरहेको छ । 

जिल्लाका नौ स्थानीय तहमध्ये मैवाखोला बाहेक प्रतियोगितामा आठ स्थानीय तहको सहभागिता रहने भएको छ । प्रतियोगिताका विजेताले ट्रफीसहित एक लाख ११ हजार १०० रुपियाँ र उपविजेताले ५५ हजार ५०० रुपियाँ राशिको नगद पुरस्कार पाउनेछन् । 

त्यस्तै सेमिफाइनल पुग्ने दुई टोलीले पनि समान नौ–नौ हजार रुपियाँ प्रोत्साहन रकम पाउने खेल संयोजक एवम् फुङ्लिङ नगरपालिका–८ का वडाध्यक्ष क्षितिज सुनुवारले जानकारी दिनुभयो ।