रेडियो काबेली
ताप्लेजुङ । चासोक तङ्नाम पर्वको अवसरमा आयोजित आमन्त्रित प्रथम कञ्चनजंघा सेसेलुङ गोल्ड कपमा बिहिबार (आज) भएको खेलमा पाँचथर फुटबल क्लब बिजयी भएको छ । भानु जन माध्यमिकको खेल मैदानमा भएको खेलमा जलथल फुटबल क्लब झापालाई १–० गोल अन्तरले पराजित गर्दै पाँचथर फुटबल क्लब बिजयी हुँदै सेमिफाईनलको यात्रा सुनिश्चित गरेको छ ।
प्रतियोगितामा ८ टिमको सहभागिता रहेको आयोजक कञ्चनजंघा फुङलिङ क्लबले जनाएको छ । जसमा आयोजक सहित सगरमाथा युथ क्लब मोरङ, बी.टि.फुटबल क्लब तेह्रथुम, जलथल फुटबल क्लब झापा, पाँचथर फुटबल क्लब पाँचथर, आठराई गाउँपालिका तेह्रथुम, रारा फुटबल क्लब धनकुटा र चक्रघट्टी फुटबल क्लब सुनसरीको सहभागिता रहेको छ ।
बुधबार भएको उद्धघाटन खेलमा आयोजक कञ्चनजंघा फुङलिङ क्लबलाई २–० गोल अन्तरले पराजित गर्दै चक्रघट्टी फुटबल क्लब सुनसरीले सेमिफाईनलको यात्रा पक्का गरि सकेको छ ।
शुक्रबार (भोली) रारा फुटबल क्लब धनकुटा र आठराई गाउँपालिका तेह्रथुम बिच प्रतिष्पर्धा हुने आयोजकले जनाएको छ ।
प्रतियोगिताको विजेताले नगद ३ लाख २ हजार ८० र उपविजेताले १ लाख ५१ हजार ८० रुपैयाँ सहित ट्रफी, मेडल, प्रमाण पत्र प्राप्त गर्ने चासोक तङनाम सञ्चालक समितिले जनाएको छ ।
प्रतिक्रिया