ताप्लेजुङ, असोज २६ गते । ताप्लेजुङमा नेपाल दलित मोर्चाको जिल्ला कार्यसमिति गठन गरिएको छ । आइतबार सदरमुकाम फुङ्लिङमा आयोजित तत्कालीन नेकपा (माओवादी केन्द्र) र नेकपा (एकीकृत समाजवादी) निकट दलित संगठनको संयुक्त जिल्ला भेलाले दिनेश खातीको नेतृत्वमा ९५ सदस्यीय जिल्ला कार्यसमिति सर्वसम्मत चयन गरेको हो ।
नवगठित समितिको सह–संयोजकमा कृष्ण लुहार चयन हुनुभएको छ । नेपाल दलित मोर्चा नेपाली कम्युनिष्ट पार्टी ९नेकपा० को भ्रातृ संगठन हो । दुई पार्टी निकट दलित संगठनबीचको एकतापछि संयुक्त जिल्ला भेला आयोजना गरी नयाँ नेतृत्व चयन गरिएको हो ।
नेपाल दलित मोर्चाका प्रदेश इन्चार्ज नेत्र नेपाली तथा नेकपाका नेताहरू विष्णुकुमार हाङ्बाङ, निता कुमारी सिँवा, सागरमणि गौतम र गंगाशंकरको लगायत जिल्ला तथा प्रदेशस्तरीय नेताहरूको उपस्थितिमा समिति गठन गरिएको हो ।
कार्यक्रममा सहभागी नेताहरूले पार्टी संगठनमा दलित समुदायको प्रतिनिधित्व र सहभागिता बढाउनुपर्नेमा जोड दिएका थिए । दलित समुदायको हक, अधिकार र सामाजिक न्यायका लागि मोर्चाले प्रभावकारी भूमिका निर्वाह गर्नुपर्ने उनीहरूको भनाइ थियो ।
समाजमा विद्यमान जातीय विभेद, छुवाछुत तथा अन्य सामाजिक कुरीति र विकृतिविरुद्ध मोर्चाले सशक्त रूपमा आवाज उठाउनुपर्ने नेताहरूले बताएका थिए । दलित समुदायको राजनीतिक, सामाजिक तथा आर्थिक अधिकार सुनिश्चित गर्न संगठनले समुदायका मुद्दालाई प्राथमिकताका साथ उठाउनुपर्नेमा समेत उनीहरूले जोड दिएका थिए ।
नवगठित जिल्ला कार्यसमितिले दलित समुदायमाथि हुने विभेदको अन्त्य, समान अधिकारको सुनिश्चितता तथा पार्टी संगठनमा दलितको अर्थपूर्ण सहभागिताका लागि काम गर्ने अपेक्षा गरिएको छ ।
प्रतिक्रिया