ताप्लेजुङ, असोज ७ गते । ताप्लेजुङको पाथीभरा याङवरक गाउँपालिकाले आगामी तीन दिन भारी वर्षा हुनसक्ने भन्दै पालिकावासीलाई उच्च सतर्कता अपनाउन आग्रह गरेको छ ।
गाउँपालिकाले बुधबार सार्वजनिक गरेको सूचनामा बंगालको खाडीमा विकसित न्यून चापीय प्रणालीको प्रभावबाट ताप्लेजुङसहित देशभर विभिन्न स्थानमा भारी वर्षा हुनसक्ने पूर्वानुमान रहेकाले सम्भावित जोखिम न्यूनीकरणका लागि उच्च सतर्कता अपनाउन आग्रह गरिएको हो ।
गाउँपालिकाका अध्यक्ष केशरकुमार सुब्बाले जारी गर्नुभएको सूचनामा असोज ९ गतेदेखि ११ गतेसम्म वर्षा तथा बाढीको सम्भावना रहेकाले स्थानीयवासीलाई सचेत रहन आग्रह गरिएको छ । भारी वर्षाका कारण खोला तथा नदीमा पानीको सतह बढ्नसक्ने, पहिरो तथा भू–क्षयको जोखिम बढ्नसक्ने भएकाले विशेष सावधानी अपनाउन गाउँपालिकाले अनुरोध गरेको छ ।
गाउँपालिकाले विपद्का सम्भावित घटनाबाट सुरक्षित रहन जोखिमयुक्त क्षेत्रमा नजान, खोला तथा नदी आसपासका क्षेत्रमा सतर्कता अपनाउन र आवश्यक अवस्थामा स्थानीय प्रशासन तथा सुरक्षा निकायले दिएको सूचनाको पालना गर्न आग्रह गरेको छ ।
गाउँपालिकाले वर्षाका कारण उत्पन्न हुनसक्ने सम्भावित विपद्बाट जनधनको क्षति हुन नदिन स्थानीयवासी, सरोकारवाला निकाय तथा सुरक्षा निकायबीच आवश्यक समन्वय र सहकार्य गर्नसमेत आग्रह गरेको छ। भारी वर्षाको समयमा बालबालिका, ज्येष्ठ नागरिक तथा जोखिममा रहेका व्यक्तिको सुरक्षामा विशेष ध्यान दिन पनि गाउँपालिकाले अनुरोध गरेको छ ।
प्रतिक्रिया