सौगात विष्ट
ताप्लेजुङ, भदौ ३० गते । ताप्लेजुङको पाथीभरा याङ्वरक गाउँपालिकाले गाउँपालिकाभित्रका सामुदायिक विद्यालयबाट एसईई उत्तीर्ण गरी हाल एमबीबीएस अध्ययन गरिरहेका विद्यार्थीलाई छात्रवृत्ति उपलब्ध गराउने भएको छ ।
गाउँपालिकाको शिक्षा, युवा तथा खेलकुद शाखाले आर्थिक वर्ष २०८३/८४ को स्वीकृत नीति, कार्यक्रम तथा बजेटअनुसार छात्रवृत्ति उपलब्ध गराउन लागेको हो । गाउँपालिका अध्यक्ष केशरकुमार सुब्बाका अनुसार सामुदायिक विद्यालयबाट अध्ययन पूरा गरी एमबीबीएस तहमा अध्ययनरत विद्यार्थीलाई प्रोत्साहनस्वरूप छात्रवृत्ति प्रदान गर्न लागिएको हो ।
छात्रवृत्तिका लागि इच्छुक विद्यार्थीले आगामी असोज १० गतेभित्र गाउँपालिकाको कार्यालयमा आवश्यक कागजातसहित निवेदन पेश गर्नुपर्नेछ । गाउँपालिकाले कार्यालय समयभित्र निवेदन दर्ता गराउन आग्रह गरेको छ ।
निवेदनसँगै नेपाली नागरिकताको प्रतिलिपि, बैङ्कको चेकको प्रतिलिपि, सम्बन्धित वडाको सिफारिसपत्र र आफू अध्ययनरत शिक्षण संस्थाको सिफारिसपत्र पेश गर्नुपर्ने गाउँपालिकाका शिक्षा अधिकृत ठाकुर प्रधानले जानकारी दिनुभयो ।
गाउँपालिकाले स्थानीय सामुदायिक विद्यालयबाट अध्ययन गरेका विद्यार्थीलाई उच्च शिक्षा अध्ययनमा प्रोत्साहन गर्ने उद्देश्यले छात्रवृत्ति कार्यक्रम अघि बढाएको जनाएको छ । छात्रवृत्तिबाट एमबीबीएस अध्ययन गरिरहेका विद्यार्थीलाई आर्थिक सहयोग पुग्ने अपेक्षा गरिएको छ ।
प्रतिक्रिया