ताप्लेजुङ, भदौ ९ गते । ताप्लेजुङको आठराई त्रिवेणी गाउँपालिकाका पाँचवटै वडामा बर्थिङ सेन्टर सञ्चालनमा आएका छन् । दोभानस्थित सामुदायिक स्वास्थ्य इकाईमा रहेको बर्थिङ सेन्टरबाट समेत प्रसूति सेवा सुरु भएपछि पालिकाका सबै वडामा संस्थागत प्रसूति सेवा उपलब्ध भएको हो ।
गाउँपालिकाले सबै वडामा आवश्यक सुविधासहितका बर्थिङ सेन्टर स्थापना गरी सञ्चालनमा ल्याउने कार्यलाई प्राथमिकताका साथ अघि बढाएको थियो । सोही अभियानअन्तर्गत दोभान सामुदायिक स्वास्थ्य इकाईबाट पहिलोपटक प्रसूति सेवा प्रदान गरिएको छ । उक्त केन्द्रबाट पहिलोपटक एक जना महिलाले प्रसूति सेवा लिँदै नवजात शिशुलाई जन्म दिनुभएको थियो ।
पाँचवटै वडामा बर्थिङ सेन्टर सञ्चालनमा आएपछि गाउँपालिका अध्यक्ष दीपेन्द्र पोमू (दीपेन) ले स्वास्थ्य क्षेत्रमा महत्वपूर्ण उपलब्धि हासिल भएको बताउनुभएको छ । उहाँले आफू निर्वाचित भएपछि बसेको पहिलो बैठकबाटै पालिकाका सबै वडामा सुविधासम्पन्न बर्थिङ सेन्टर सञ्चालनमा ल्याउने निर्णय गरेको बताउनुभयो ।
गाउँपालिकाका स्वास्थ्य शाखा प्रमुख समीर प्रधानका अनुसार पालिकाभित्र ११ वटा स्वास्थ्य संस्था सञ्चालनमा रहेका छन् । तीमध्ये सात वटा स्वास्थ्य चौकी, एउटा आधारभूत स्वास्थ्य चौकी र तीन वटा सामुदायिक स्वास्थ्य इकाई रहेका छन् ।
प्रधानका अनुसार आर्थिक वर्ष २०८२/८३ मा गाउँपालिकाका विभिन्न बर्थिङ सेन्टरबाट ५५ जनाले संस्थागत रूपमा प्रसूति सेवा लिएका थिए । चालु आर्थिक वर्षको साउन महिनामा पाँच जनाले संस्थागत प्रसूति सेवा लिएका छन् । यस्तै, भदौ महिनाको पहिलो सातासम्म दोभान सामुदायिक स्वास्थ्य इकाईबाट एक जनासहित चालु आर्थिक वर्षमा हालसम्म छ जनाले संस्थागत प्रसूति सेवा लिइसकेका छन् ।
सबै वडामा बर्थिङ सेन्टर सञ्चालनमा आएपछि गर्भवती महिलालाई प्रसूति सेवाका लागि टाढा जानुपर्ने बाध्यता कम हुनुका साथै सुरक्षित मातृत्व सेवामा पहुँच विस्तार हुने अपेक्षा गरिएको छ ।
प्रतिक्रिया