ताप्लेजुङ, साउन ३१ गते । ताप्लेजुङमा १२ बोरे बन्दुकसहित एक युवक पक्राउ परेका छन् । जिल्लाको फक्ताङलुङ गाउँपालिकाबाट १२ बोरे बन्दुक एक थानसहित एक युवक पक्राउ परेका हुन् ।
पक्राउ पर्नेमा झापाको दमक नगरपालिका–५ बेलडाँगी घर भई हाल ताप्लेजुङको फक्ताङलुङ गाउँपालिका–५ मा डेरा गरी बस्दै आएका २९ वर्षीय मुस्कान दियाली रहेको प्रहरी निरीक्षक तथा सूचना अधिकारी बिन्देश्वर यादवले जानकारी दिनुभयो । उहाँका अनुसार प्रहरी चौकी लुङथुङबाट खटिएको प्रहरी टोलीले उनलाई पक्राउ गरेको हो ।
प्रहरीले दियालीलाई बन्दुकसहित नियन्त्रणमा लिएर जिल्ला प्रहरी कार्यालय ताप्लेजुङमा दाखिला गराएको छ । बरामद भएको बन्दुकसहित दियालीमाथि मुलुकी अपराध संहिता, २०७४ को परिच्छेद–६ अन्तर्गत हातहतियार तथा खरखजाना सम्बन्धी कसुरमा थप अनुसन्धान भइरहेको प्रहरी निरीक्षक तथा सूचना अधिकारी यादवले बताउनुभयो ।
प्रहरीले बरामद भएको बन्दुक कहाँबाट ल्याइएको हो र त्यसको प्रयोगसम्बन्धी विषयमा समेत अनुसन्धान गरिरहेको जनाएको छ ।
प्रतिक्रिया