ताप्लेजुङ, साउन ३१ गते । ताप्लेजुङको फुङ्लिङ बजारमा चारपाङ्ग्रे सवारीसाधनका लागि एकतर्फी यातायात प्रणाली लागू गरिने भएको छ । बजारमा बढ्दो सवारी चाप र अव्यवस्थित पार्किङ व्यवस्थापन गर्न एकतर्फी यातायात प्रणाली लागू गरिने भएको हो ।
नयाँ व्यवस्थाअनुसार तोक्मेतर्फ जाने सवारीसाधन बुद्धचोक–तोक्मे हाट हुँदै बाहिरिनुपर्ने जिल्ला ट्राफिक प्रहरी कार्यालय ताप्लेजुङका निमित्त प्रमुख सुवास काम्बाङले जानकारी दिनुभयो । उहाँका अनुसार तोक्मेबाट बजार प्रवेश गर्ने सवारी दोबाटो हुँदै आउनुपर्नेछ ।
यस्तै दोबाटोबाट कोप्चे हुँदै वीरेन्द्रचोक जान सकिने भए पनि वीरेन्द्रचोकबाट कोप्चे हुँदै पुनः दोबाटोतर्फ जान भने पाइने छैन । बजारमा बढ्दो सवारी चाप, साँघुरा सडक र पर्याप्त पार्किङस्थलको अभावका कारण एकतर्फी यातायातको व्यवस्था गर्नुपरेको निमित्त प्रमुख काङ्बाङको भनाई छ । चाडपर्व, मेला तथा उत्सवका समयमा थपिने सवारी चापलाई समेत ध्यानमा राखेर नयाँ व्यवस्था गरिएको उहाँले बताउनुभयो ।
ट्राफिक प्रहरीले चालकलाई नयाँ व्यवस्थाबारे जानकारी गराउने काम भइरहेको जनाउँदै सोमबारदेखि नियम उल्लङ्घन गर्नेलाई जरिवानासहित कारबाही गर्ने चेतावनी समेत दिइएको छ ।
प्रतिक्रिया