ताप्लेजुङ, पुस ३ गते । ताप्लेजुङको फक्ताङलुङ गाउँपालिका–२ खेजेनिमा प्रथम मानाभारा गोल्ड कप सञ्चालन हुने भएको छ । आगामी पोष १५ गते देखि १९ गते सम्म मानाभारा युथ स्पोर्टिङ क्लबको आयोजनामा प्रथम मानाभारा गोल्ड कप सञ्चालन हुने भएको हो ।
स्थानीय स्तरमा उत्पादित प्रमुख नगदे बाली अलैँचीको प्रवर्द्धन साथै विश्वमा छरिएर रहनु भएका लिम्बू जातिको शिर उठाउने ठाउँ ‘नाहाङ्मा–यक’ र गडीडाँडाको संरक्षण तथा प्रचार प्रसारका लागि गोल्ड कपको आयोजना गर्न लागिएको क्लबका संरक्षक विकास साम्रा रविनले जानकारी दिनुभयो । उहाँका अनुसार प्रथम मानाभारा गोल्ड कप अन्तरगत अन्तर क्लब स्तरीय आमन्त्रित पुरुष फुटबल प्रतियोगिता सञ्चालन हुने छ ।
खेजेनिमको आहाले टारमा सञ्चालन हुने प्रतियोगितामा जम्मा आठ टिमको सहभागिता रहने छ । जसमा एक टिम भने जिल्ला बाहीरको रहने क्लबका सचिव मौसम अन्छङ्बोले जानकारी दिनुभयो । उहाँका अनुसार प्रतियोगितामा आयोजक टिम मानाभारा युथ स्पोर्टिङ क्लब सँगै सिँवा स्पोर्टिङ क्लब लिङखिम, माछापोखरी हिटी क्लब चाँगे, नव प्रयास युनाईटेड क्लब हाङ्देवा, प्रगतिशील युवा क्लब लिङ्तेप, लालीगुराँस स्पोर्टिङ क्लब सुरुमखिम र जनसेवा स्पोर्टिङ क्लब ढुङगेसाँघुको सहभागीता रहने छ ।
जिल्ला बाहिरका एक टिमको भने टुङ्गो लाग्न बाँकी रहेको अन्छङ्बोको भनाई छ । प्रतियोगिताको विजेताले नगद ३ लाख २ हजार ८२ रुपियाँ सहित ट्रफी, मेडल र प्रमाण पत्र प्राप्त गर्ने छन् । यस्तै उपविजेतालाई नगद १ लाख ५२ हजार ८२ रुपियाँ सहित ट्रफी, मेडल र प्रमाण पत्रको व्यवस्था गरिएको छ ।
साथै विभिन्न विधामा सर्वोत्कृष्ट बन्ने खेलाडीलाई समेत उचित नगद पुरस्कारको व्यवस्था गरिएको आयोजकले जनाएको छ ।
प्रतिक्रिया