ताप्लेजुङ, मंसिर २६ गते । नेपाली काङ्ग्रेस ताप्लेजुङले प्रतिनिधिसभाको प्रत्यक्षतर्फ गजेन्द्रप्रसाद तुम्याहाङको एकल नाम सिफारिस गरेको छ । आगामी फागुन २१ गते सम्पन्न हुने प्रतिनिधि सभा सदस्यका लागि जिल्ला सभापतिसमेत रहनुभएका तुम्याहाङको एकल नाम सिफारिस गरिएको हो ।
मंसिर २५ गते बसेको संयुक्त बैठक र २६ गते बिहान बसेको जिल्ला कार्यसमिति ताप्लेजुङको बैठकले तुम्याहाङको नाम सिफारिस गरिएको काङ्ग्रेस ताप्लेजुङका प्रवक्ता विश्व नाल्बोले जानकारी दिनुभयो । उहाँका अनुसार समानुपातिकतर्फ खुल्लामा कोशी प्रदेशका पूर्व मन्त्री प्रताप प्रकाश हाङ्गाम र पूर्व जिल्ला सभापति केशवप्रसाद दाहाल तथा महिलातर्फ कल्पनादेवी सिटौलाको नाम सिफारिस गरिएको छ ।
राष्ट्रिय सभातर्फ क्लष्टर अनुसार १० जनाको नाम सिफारिस गरिएको छ । यस्तै राष्ट्रिय सभामा खुल्लातर्फ मणि लामा, पदमसुन्दर पालुङ्वा, मात्रिकाप्रसाद शेर्पा, गीताकुमारी सेन्दाङ र बलबहादुर तामाङ तथा अपाङ्गता भएका व्यक्तितर्फ तिलप्रसाद सुब्बाको नाम सिफारिस गरिएको छ ।
महिलातर्फ लिलादेवी बोखिम, मात्रिकादेवी प्रसाईँ कार्की, गीता चौहान र प्रमिला गुरुङको नाम सिफारिस गरिएको छ ।
प्रतिक्रिया