ताप्लेजुङ, मंसिर ६ गते । कोशी प्रदेशमा रहेका ४२ वटा हिमताल उच्च जोखिमयुक्त अवस्थामा रहेको अन्तर्राष्ट्रिय एकीकृत पर्वतीय विकास केन्द्र (इसिमोड) ले तथ्याङ्क सार्वजनिक गरेको छ ।
सङ्खुवासभाको सदरमुकाम खाँदबारीमा आयोजित ‘नेपालका हिमनदी तथा हिमतालमा भइरहेको तीव्र परिवर्तनले उत्पन्न जोखिम’ सम्बन्धी अन्तरक्रियामा इसिमोडका विज्ञ शरदप्रसाद जोशीले सन् २०२० को प्रतिवेदनमार्फत तथ्याङ्कबारे जानकारी गराउनुभयो ।
जोशीका अनुसार नेपालमा रहेका २ हजार ६९ हिमतालमध्ये कोशी क्षेत्रमा ४२ वटा अत्यन्तै जोखिमयुक्त अवस्थामा छन् । हिमताल फुटे ठूलो जनधन तथा भौतिक संरचनामा विनाश हुनसक्ने उल्लेख गर्दै जोशीले उच्च सतर्कता तथा पूर्वतयारी आवश्यक रहेकामा जोड दिनुभएको छ ।
तल्लो वरुण क्षेत्रको ठूलोपोखरी हिमताल सबैभन्दा जोखिमयुक्त मानिएको छ ।
प्रतिक्रिया