ताप्लेजुङ । तेश्रो ताप्लेजुङ गोल्ड कपका लागि टिकट बिक्रीको जिम्मेवारी लिएका मेरिङदेन गाउँपालिका ५ थुकिमाका विशाल लङ्वाले लिम्बूले आइतबार आयोजकसँग सम्झौता गर्नु भएको छ । फुङलिङ नगरपालिका वडा नं. ४ वडा कार्यालयमा वडाध्यक्ष दुर्गा पालुङवाको रोहबरमा सम्झौता गरिएको हो ।
२० लाख एक हजार बुझाउने सर्तमा लिएको जिम्मेवारी अनुसार पहिलो चरणमा उहाँले ७५ प्रतिशत रकम बुझाएर सम्झौता गर्नुभएको छ । लङ्वाले १५ लाख ७ सय ५० रुपैयाँ बुझाउनु भएको कोषाध्यक्ष दावा शेर्पाले जानकारी दिनुभएको छ । बाँकी २५ प्रतिशत रकम अर्थात ५ लाख २ सय ५० रुपैयाँ फाइनल खेल हुनुअघि बुझाउनु पर्ने छ ।
प्रतियोगिताका दर्शकले क्वाटर फाइनलका चार खेलका लागि एक सय, सेमिफाइनलका दुई खेलका लागि दुई सय र फाइनलमा दुई सय ५० रुपैयाँ बुझाएर प्रवेश पाउने छन् । सम्झौतामा लाखेजात्रा सञ्चालक समितिका अध्यक्ष सागर मादेन, कोषाध्यक्ष दावा शेर्पा, पूर्व अध्यक्ष नारान थापा लगायतको उपस्थिति रहेको थियो ।
गत वर्ष गोल्ड कपमा २४ लाख ४८ हजार पाँच सय रुपियाँको टिकट बिक्री भएको थियो । फाइनलमा एकैदिन १० लाख १४ हजार रुपैयाँको टिकट बिक्री भएको थियो । उक्त दिन ४ हजार ५६ जना दर्शकले २५० दरले टिकट काटेका थिए ।
टिकट बिक्रीका लागि स्वयंसेवक परिचालन लगायतको जिम्मेवारी टिकट बिक्रेताको हुनेछ । ताप्लेजुङमा पहिलो पटक आयोजकले टिकट बिक्रीको कार्य ठेक्का प्रकृयाबाट गर्ने भएको हो ।
प्रतिक्रिया