साहारा लिम्बू
ताप्लेजुङ। आठराई त्रिवेणी गाउँपालिकाका अध्यक्ष दिपेन्द्र पोमु (दिपेन)ले आफ्नो कार्यकाल तीन वर्ष पुरा भएको अवसरमा प्रगति विवरण सार्वजनिक गर्नुभएको छ । अध्यक्ष दिपेनले जनताको मतबाट निर्वाचित भएर कार्यभार सम्हालेको तीन वर्ष पूरा भएको अवसरमा आफूले गरेको कार्य प्रतिको विवरण सार्वजनिक गर्नुभएको हो ।
पूर्वाधार विकास
तीन वर्षको अवधिमा पालिका भित्र ६५ किलोमिटरभन्दा बढी ग्रामीण सडक स्तरोन्नति र मर्मत गर्ने काम भएको सार्वजनिक प्रगति विवरणमा उल्लेख गरिएको छ । यो सँगै गाउँपालिकाको प्रशासकीय भवन सम्पन्न हुने अन्तिम चरणमा रहेको र अन्य वडाको वडा कार्यालय भवनहरू पनि निर्माण भई सञ्चालनमा आएका छन् ।
यस्तै वडा नं. १ मा सामुदायिक भवन निर्माण सम्पन्न भई सञ्चालनमा रहेको जनाइएको छ । यो सँगै पालिका स्तरीय बहुउद्देश्य कभर्डहल निर्माणको कार्य पनि अन्तिम चरणमा पुगेको छ ।
पालिकाको आसपासको बाटो कालो पत्रे गर्ने काम अन्तिम चरणमा पुगेको पालिका अध्यक्ष पोमुको भनाई छ । ताप्लेजुङ जिल्लाबाट धरान सम्म जानका लागी वैकल्पिक मार्गको रुपमा गोर्जा–सुर्के–सेलेले–भुजे–गुफा सडक खण्डको ट्रयाक ओपनको कार्य सम्पन्न भएको छ ।
यस्तै लिम्बुनी पुल चोक्पुर हिले रमिते हुँदै पालिका सदरमुकाम जोड्ने सडक निर्माणको कामको सुरुवात भएको छ । मुलचोक पाथिभरा देवस्थललाई धार्मिक तथा पर्यटकीय स्थलको रुपमा विकास गरिएको र थप व्यवस्थित गर्ने कार्य भइरहेको छ ।
एक वडा एक खेलमैदान विस्तार गर्ने योजना अनुरूप गाउँपालिकाको २ नं. वडाको महभिर खेल मैदान र १ नं. वडाको जनकल्याण आधारभुत विद्यालयको खेल मैदान निर्माण भइरहेको जनाइएको छ । एक वडा एक बर्थिङ सेन्टर स्थापना गर्ने योजना अनुसार वडा नं. १, ३, ४ मा बर्थिङ सेन्टर निर्माण भई सञ्चालनमा रहेको र वडा नं. २ को निर्माण कार्य अन्तिम चरणमा पुगेको छ । साथै वडा नं. ५ मा भने निर्माणाधीन अवस्थामा रहेको छ ।
यस्तै १० शैयाको अस्पताल निर्माण कार्य तीव्र गतिमा अघि बढिरहेको र हाङपाङ र चाँगे जोड्ने सोबुवाखोलामा पक्कीपुल निर्माणको कार्य भइरहेको छ ।
स्वास्थ्य सेवा विस्तार
स्वास्थ्य सेवा अन्तरगत गर्भवती तथा सुत्केरीका लागि निशुल्क एम्बुलेन्स सेवा सञ्चालनमा ल्याइएको छ । ७० वर्ष माथिका ज्येष्ठ नागरिकहरूका लागि निशुल्क स्वास्थ्य परिक्षण साथै ३२१ जनालाई निशुल्क चस्मा उपहार र ५९ जनालाई निशुल्क दन्त उपहार प्रदान गरिएको छ ।
यस्तै विपन्न परिवारलाई औषधी उपचार सहायता वापत २० हजार रुपियाँको दरले उपचार सहायता प्रदान गरिदै आएको छ । रेबिज विरुद्धको खोप पालिका भित्रका स्वास्थ्य संस्था वडा नं. १ र वडा नं. ३ बाट उपलब्ध गराउन सुरु गरिएको छ ।
शिक्षामा गुणस्तर र पहुँच विस्तार
सामुदायिक विद्यालयमा कक्षा १२ सम्मको निःशुल्क शिक्षा कार्यान्वयनमा ल्याइएको छ । यो सँगै सरस्वती नमुना माध्यमिक विद्यालयमा पशु प्राविधिक विषय पनि सञ्चालनमा ल्याइएको छ । शिक्षकहरुलाई मासिक रुपमै विगत २ वर्ष यता तलव भत्ता उपलब्ध गराउँदै आएको प्रगति विवरणमा उल्लेख गरिएको छ ।
सामुदायिक विद्यालयको शैक्षिक गुणस्तर वृद्दीका लागी विद्यालयका शिक्षक, सरोकारवाला, र पालिका विच आमशिक्षा भेला गरी अन्तक्र्रिया गोष्टी सञ्चालन गरिन्दै आएको छ । यस्तै पालिका स्तरीय नमुना विद्यालय छनौट गरी सञ्चालनमा ल्याइएको छ ।
कृषि तथा वातावरण संरक्षण
तीन वर्षको अवधिमा एक घर एक धारा अभियान सुरु गरिएको छ । प्रत्येक वडा हरुमा कृषि पाठ सालाहरुको निर्माण गरी सञ्चालनमा आएको छ । कृषक समूहहरूलाई मल, उन्नत विउ वितरण गर्ने कार्य भईरहेको छ । यस्तै कृषक फर्म तथा कृषक समुहहरुलाई प्रत्सोहान स्वरुप अनुदान रकमहरु उपलब्ध गराउन सुरु गरिएको छ ।
सुशासन, पारदर्शिता र डिजिटल सेवा
सबै सरकारी कार्यालय तथा विद्यालयहरुमा निशुल्क फाईबर नेट जडानको काम अन्तिम चरणमा पुगेको छ । नागरिकता, जन्मदर्ता, सिफारिस सेवा अनलाइन मार्फत प्रदान गर्न सुरु गरिएको छ । वडागत सार्वजनिक सुनुवाइ कार्यक्रम सञ्चालनमा ल्याइएको छ ।
यस्तै सिसी क्यामेरा जडान गरी शान्ति सुरक्षा व्यवस्थापन मजबुत बनाउने कोसिस गरिएको छ । प्रत्येक सरकारी कार्यालय तथा विद्यालयहरुमा ईहाजिरी जडान साथै सिसिक्यामरा जडान गरिएको छ ।
विद्युत सेवा विस्तार
निर्वाचित भएको पहिलो निर्णयको रुपमा निशुल्क विद्युत सेवा उपलब्ध गराउँने योजना अनुरूप पालिका भरिका सबै जनातालाई निशुल्क विद्युत सेवा उपलब्ध गराइएको सार्वजनिक प्रगति विवरणमा उल्लेख गरिएको छ ।
प्रतिक्रिया