पोखरा र भैरहवा विमानस्थलबारे आफ्नो हस्ताक्षरमा निर्णय भएको प्रमाण देखाउन योगेश भट्टराईको चुनौती 

ताप्लेजुङ । नेकपा (एमाले)का सचिव तथा प्रतिनिधि सभा सदस्य योगेश भट्टराईले पोखरा र भैरहवा विमानस्थलमा आफूले गरेको हस्ताक्षरले राज्यलाई भएको नोक्सानीको प्रमाण देखाउन चुनौती दिनुभएको छ । पूर्वसंस्कृति, पर्यटन तथा नागरिक उड्डयन मन्त्रीसमेत रहनुभएका उहाँले सोमबार सामाजिक सञ्जालमार्फत प्रमाण देखाउन चुनौती दिनुभएको हो । 

उहाँले सामाजिक सञ्जाल फेसबुकमा लेख्नुभएको छ, ‘म २०७६ साउन १५ गतेदेखि २०७७ पुस ५ गतेसम्म संस्कृति, पर्यटन तथा नागरिक मन्त्रीको जिम्मेवारीमा रहेको हो,’ उहाँले थप्नुभएको छ, ‘उक्त समयमा पोखरा र भैरहवा विमानस्थल बारेमा मेरो हस्ताक्षरमा कुनै निर्णयले राज्यलाई कुनै नोक्सानी भएको भए प्रमाण सहित सार्वजनिक गर्न मेराविरुद्ध प्रायोजित समाचार उत्पादन गर्ने कारखानालाई चुनौती छ।’

उहाँले आफूमाथि औंला उठाउनेहरू नै यसमा पर्ने बताउनुभएको छ । उहाँ लेख्नुहुन्छ, ‘मलाई औंला उठाउनेहरू नै पर्नेवाला छन्, डकुमेन्ट मसँग छ । आवश्यक परे सार्वजनिक गरौंला,’ उहाँले भन्नुभएको छ ।