शिक्षक आन्दोलनको प्रभाव : मैवाखोला गाउँपालिकामा हुने वृहत सिकाइ मेला स्थगित 

ताप्लेजुङ । ताप्लेजुङको मैवाखोला गाउँपालिकामा बुधबार हुने भनिएको वृहत सिकाइ मेला स्थगित गएको छ । शिक्षक आन्दोलनका कारण मैवाखोला गाउँपालिकाको श्री नारायणी माध्यमिक विद्यालय साँघुमा हुने भनिएको कार्यमूलक सीपमा आधारित वृहत सिकाइ मेला २०८१ स्थगित गरिएको हो । 

गाउँपालिकाले मङ्गलबार एक विज्ञप्ति जारी गर्दै चैत २० गते देखि शुरु भएको शिक्षकहरूको आन्दोलनलाई सम्मान गर्दै वृहत सिकाइ मेला स्थगित गरेको जानकारी गराएको छ । देशभरका सार्वजनिक विद्यालयहरूमा कार्यरत शिक्षक तथा विद्यालयका कर्मचारीहरूको आन्दोलनका कारण देशभरका शैक्षिक गतिविधि प्रभावित भएकोले शिक्षकहरूको मागलाई चाँडो सम्बोधन गरी विद्यालयमा फर्काउने वातावरण बनाउनु पर्ने माग राखिएको छ । 

गुणस्तरको हिसाबले दयनीय भइरहेको सार्वजनिक शिक्षालाई सुधारमा ल्याउनु सरोकारवाला सबै निकाय र तहको भूमिका आवश्यक भएको गाउँपालिकाका अध्यक्ष विजय प्रकाश वनेमले बताउनुभयो । उहाँका अनुसार लाखौं बालबालिकाहरूको भविष्यसँग जोडिएको शिक्षा क्षेत्रमा हाल देखा परिरहेको समस्याहरुलाई समाधान गर्नमा सरोकारवाला सबै जिम्मेवार हुनु पर्ने छ ।

यस्तै गाउँपालिकाले आन्दोलनरत शिक्षकहरूलाई सफलताको शुभकामना समेत प्रदान गरेको छ ।