ताप्लेजुङ । शनिबारबाट सुरु हुने छैटौँ ताप्लेजुङ बज्र गुरु मन्त्रजप कार्यक्रमको तयारी पुरा भएको छ । विश्व शान्ति र मानव एकताका लागि ताप्लेजुङको फुङलिङ नगरपालिका ९ सुकेटारमा ३ दिने वृहत ताप्लेजुङ बज्र गुरु मन्त्रजप कार्यक्रमको तयारी पुरा भएको हो ।
बज्र गुरु मन्त्रजप मूल आयोजक समितिका सचिव पासाङरिता शेर्पाका अनुसार भारतका विश्व प्रख्यात प्रमुख लामा कुन्दोलिङ ताक्छक रिन्पोछेको उपस्थितिमा मन्त्रजप गरिने छ । प्रमुख लामा कुन्दोलिङ ताक्छक रिन्पोछेलाई शुक्रबार काबेलीबाट स्वागत गरि ताप्लेजुङको फुङलिङ बजार विरेन्द्र चोकमा स्वागत कार्यक्रम गरि कार्यक्रम स्थलमा लगिने छ । स्वगत कार्यक्रममा टासी सोल्पा नृत्य प्रस्तुत गरिने मूल आयोजक समितिका सदस्य दावा शेर्पाले बताउनुभयो ।
मन्त्रजपमा करिब २० हजार श्रद्धालु भक्तजनहरूको उपस्थिति रहने बताइएको छ । बि. सं. २०७३ सालबाट सुरु भएको मन्त्रजप कार्यक्रम कोभिड महामारीको समयमा ३ वर्ष स्थगित भएको थियो । त्यस पश्चात पुन निरन्तर मन्त्रजप कार्यक्रम हुँदै आइरहेको छ ।
२३ गते बिहान ७ बजेदेखि दिउँसो १ बजेसम्म मन्त्रजप तथा पुजा र मध्यान्ह १२ बजेदेखि ५ बजेसम्म प्रवचन सहित आगम प्रदान गरिनेछ । त्यस्तै चैत २४ गते बिहान मन्त्रजप र १ बजेदेखि साँझ ५ बजेसम्म प्रवचन सहित आगम प्रदान गर्ने तयारी भइरहेको छ । कार्यक्रमको अन्तिम दिन चैत २५ गते परम श्रद्धेय रिन्पोछेबाट प्रवचन, श्वेत ताराको आयु अभिषेक गर्ने सचिव शेर्पाको भनाई छ । समितिका अनुसार कार्यक्रम अवधि भरि नै बुद्ध भगवानको अस्तु धातु रिङसेल दर्शन गराइने छ ।
मन्त्रजप गर्दा आफ्नो मन शुद्ध भई सबै प्रकारका पुण्य लाभ प्राप्त हुने र गुरु पद्म लिला सम्भवको प्रार्थना गरेमा सबै प्रकारका बिघ्नबाधा समाप्त भई सुख शान्तिका साथै मनोकामना पुरा हुने विश्वास रहेको छ । कार्यक्रममा करिब ६० लाख बढी खर्च हुने आयोजकको अनुमान रहेको छ । गत वर्ष ६८ लाखभन्दा बढी खर्च भएको थियो । गत वर्ष स्टेज निर्माणमा करिब १० लाख खर्च भएको थियो ।
१० वर्षसम्मका लागि सोही क्षेत्रमा मन्त्रजप कार्यक्रम गर्ने गरि स्टेज लगायतको व्यवस्थापनमा खर्च भएको थियो । यस वर्षदेखि स्टेज व्यवस्थापनमा खर्च गरिरहनु नपर्ने भएकोले गत वर्षको तुलनामा कम खर्च हुने समितिका अध्यक्ष फुपु छेम्बे शेर्पा (थुप्देन जिग्डोल) ले बताउनुभयो । मन्त्रजप कार्यक्रमको व्यवस्थापनका लागि भक्तजनहरू मार्फत प्राप्त हुने दक्षिणा नै प्रमुख श्रोत हुने बताइएको छ ।
मन्त्रजप कार्यक्रममा बिहानको खाना व्यवस्थापन गर्न चाहनेका लागि ३५ हजार रुपियाँ, बेलुकाको व्यवस्थापन गर्न चाहनेका लागि ३० हजार रुपियाँ र एक दिनको लागि १ लाख १० हजार रुपियाँ दर निर्धारण गरिएको समितिका सचिव शेर्पाले बताउनुभयो ।
प्रतिक्रिया