लैङ्गिक हिंसा विरुद्धको १६ दिने अभियान अन्तरगत नगरसफाई

रेडियो काबेली
ताप्लेजुङ । लैङ्गिक हिंसा विरुद्धको १६ दिने अभियान अन्तरगत बुधबार नगरसफाई गरिएको छ । फुङलिङ नगरपालिकाको आयोजनामा जिल्लाको सदरमुकाम समेत रहेको फुङलिङ बजारस्थित शनिबारे हाट, तोक्मेबजार र बसपार्क क्षेत्र सरसफाई गरिएको हो । नगर क्षेत्रलाई सुन्दर र सफा बनाउने उद्धेश्यले सरसफाई कार्यक्रम गरिएको नगर उप–प्रमुख भिमादेवी ओझाले जानकारी दिनुभयो ।

कार्यक्रममा प्रमुख जिल्ला अधिकारी नरेन्द्र प्रसाद शर्मा, जिल्ला प्रहरी कार्यालय ताप्लेजुङका प्रहरी प्रमुख एव प्रहरी नायब उपरिक्षक रवि रावल सहित नेपाल प्रहरीको टोली, शशस्त्र प्रहरी बल नं. १ गुल्म हेडक्वाटर कञ्चनजंघा गुल्मका गुल्मपति नेरश महर्जन सहित शशस्त्र प्रहरीको टोली र स्थानीयको सहभागिता रहेको थियो ।

हरेक वर्ष नोभेम्बर २५ देखी डिसेम्बर १० तारिख सम्म अन्तराष्ट्रिय रुपमा मनाईने यो अभियान यस वर्ष “हामी सबैको प्रतिवद्धताः लैङ्गिक हिंसा अन्त्यको लागि प्रतिवद्धता” भन्ने राष्ट्रिय नाराका साथ मनाईदैँछ । यस अभियान अन्तरगत फुङलिङ नगरपालिकाले जनचेतनामुलक नाटक, अन्तरक्रिया, होर्डिङ बोर्ड, फलफुल वितरण, वक्तृत्वकला कार्यक्रम लगायत गर्ने जनाएको छ ।