एलिना दियाली
ताप्लेजुङ । जिल्लाको सिरिजङ्गा गाउँपालिका वडा नं. ३ सिकैचामा यहि मंसिर १६ गते हुने उपनिर्वाचनका लागि अन्तिम मतदाताको टुङ्गो लागेको छ । जिल्ला निर्वाचन कार्यलयले अन्तिम मतदाताको नामावली सार्वजनिक गर्दै उक्त निर्वाचनमा १ हजार ५ सय २८ मतादाता रहेको जनाएको हो । जिल्ला निर्वाचन कार्यालय ताप्लेजुङका निमित्त जिल्ला निर्वाचन अधिकारी बान्दवराज (विपिन) दुलालका अनुसार कुञ्जारी मतदानस्थलमा पुरुष ५५७ र महिला ४६९ गरि कुल १ हजार २६ जना जना मतदाता रहेका छन् ।
त्यस्तै ओसे मतदान स्थलमा पुरुष २८७ र महिला २१५ गरि कुल ५ सय २ जना मतादाता रहेका छन् । निर्वाचनको लागि जिल्ला निर्वाचन कार्यालय ताप्लेजुङले सरस्वती माध्यमिक विद्यालय कुञ्जारी र दुर्गा माध्यमिक विद्यालय ओसे गरि दुई स्थानलाई मतदान स्थल तोकेको छ । त्यस्तै निर्वाचन आयोगले जिल्ला अदालत ताप्लेजुङका न्यायधिस विकास श्रेष्ठलाई मुख्य निर्वाचन अधिकृत तोकिसकेको छ । वडाध्यक्ष दिलप्रसाद बोखिम वैदेशिक रोजगारीमा गई २०८० साल कात्तिक २४ गते देखि वडामा उपस्थित नभएपछि र हङ्कङबाट वडाध्यक्ष बोखिमले २०८१ साल असोज १८ गते राजीनामा पत्र पठाएपछि सिकैचाको वडाध्यक्षका लागि उपनिर्वाचन गर्न लागेको हो ।
निर्वाचनमा ०८१ मंसिर १५ गते सम्म १८ उमेर पुगेका व्यक्तिले मतदान गर्न सक्नेछन् ।मतदान मङ्सिर १६ गते बिहान ७ देखि ५ बजेसम्म हुने आयोगले जनाएको छ । नेपालको संविधान तथा स्थानीय तह निर्वाचन ऐन, २०७३ बमोजिम निर्वाचित जनप्रतिनिधिको पदावधि समाप्त नहुँदै निजको पद कुनै कारणले रिक्त भएमा र एक वर्षभन्दा बढि पदावधि बाँकी रहेको अवस्थामा बाँकी अवधिका लागि उपनिर्वाचनद्वारा पद पूर्ति हुने व्यवस्था छ ।
प्रतिक्रिया