ताप्लेजुङ । पाथिभरा क्षेत्र विकास समितिले पछिल्लो २ महिनाको भेटीघाटी सार्वजनिक गरेको छ । चालु आर्थिक वर्ष २०८१/८२ को साउन र भदौ महिनाको भेटी सार्वजनिक गरिएको हो ।
समितिका कार्यकारी निर्देशक प्रजिन हाङबाङका अनुसार साउन महिनामा ६ लाख ९१ हजार र भदौ महिनामा ११ लाख ३५ हजार ५ सय ५५ रुपैयाँ गरि जम्मा १८ लाख २६ हजार ५ सय ५५ रुपैयाँ भेटी सङ्कलन गरिएको छ । समितिले हरेक महिना भेटीघाटी सार्वजनिक गर्दै आएपनि केही महिना यता भने क्षेत्र विकास समिति विहीन भएको कारण भेटीको विवरण सार्वजनिक भएको थिएन ।
संघिय सरकारले क्षेत्र विकासलाई प्रदेशमा हस्तान्तरण गरेपश्चात् समिति विहीन बनेको थियो । अध्यक्ष रक्कि थेवे र कार्यकारी निर्देशक हाङबाहाङले संयुक्त रुपमा सर्वोच्च अदालतमा पुनर्बहालीका लागि रिट दर्ता गरेसँगै अदालतले उहाँहरूको पक्षमा फैसला गरेको हो ।
समिति बिहिन बनेको क्षेत्र विकासमा अदालतले पुरानै समितिलाई पुन जिम्मेवारी दिने फैसला गरेसँगै समितिले आफ्ना कामलाई अगाडि बढाउँदै भेटी घाटीको विवरण सार्वजनिक गरेको छ । यस्तै पाथिभरा (मुक्कुलुङ)मा साउनमा १ हजार ९ सय ५५ र भदौमा ९ हजार ९ सय ३९ जना तीर्थयात्री पुगेका थिए ।
यहाँ वार्षिक लाखौँको सङ्ख्यामा देश तथा विदेशबाट भक्तजन आउने गरेका छन् ।
प्रतिक्रिया