ताप्लेजुङ । ताप्लेजुङमा जारी अन्तर्राष्ट्रिय आमन्त्रण दोश्रो ताप्लेजुङ गोल्डकपमा आजदेखि सेमिफाइनल चरणका खेलहरू सुरु हुँदैछन् । गत भाद्र ३ गतेदेखि सुरु भएको प्रतियोगितामा आज सेमिफाइनलको पहिलो खेल हुन लागेको हो ।
पहिलो खेलमा संघर्ष स्पोर्टिङ युवा क्लब ताप्लेजुङ र सगरमाथा युथ क्लब मोरङबीच प्रतिष्पर्धा हुदैछ । दुवैटोली आजको खेल जित्दै फाइनलको यात्रा सुरक्षित गर्ने लक्ष्यका साथ मैदान उत्रिने तयारीमा रहेका छन् । ताप्लेजुङले पाहुना टीम भारत सिलगुडीको कञ्चनजङ्घा फुटबल क्लवलाई ७–५ गोलले पराजित गर्दै सेमिफाइनलमा प्रवेश गरेको हो ।
यस्तै मोरङले रूपन्देहीको बुटवल लुम्बिनी फुटबल क्लवलाई १–० गोलले पछि पार्दै सेमिफाइनलमा ताप्लेजुङसँगको भिडन्त पक्का गरेको थियो । ताप्लेजुङको टिममा शतप्रतिशत खेलाडी जिल्ला भित्रकै रहेका छन् । खेलाडी उत्पादनलाई विशेष प्राथमिकतामा राखेर जिल्ला भित्रकै खेलाडीहरूलाई प्रशिक्षण प्रदान गरि बाहिरको खेलाडी समावेश नगरिएको प्रशिक्षक डिके मादेनले बताउनुभयो ।
मोरङमा समेत करिब ९० प्रतिशत खेलाडी जिल्ला भित्रकै रहेको प्रशिक्षक युबेन गुरुङले बताउनुभएको छ । आजको खेल समेत निर्धारित समय दिउँसोको ठीक साढे दुई बजेबाट नै सुरु हुने आयोजकले जनाएको छ । सेमिफाइनलका दुई ओटा खेलका लागि टिकट दर दुई सय रुपैयाँ निर्धारण गरिएको छ ।
भदौ १० गते हुने प्रतियोगिताको विजेताले ५ लाख र उपविजेताले २ लाख ५० हजार ५ सय ५५ रुपैयाँ सहित ट्रफी, मेडल र प्रमाण पत्र प्राप्त गर्ने छन् ।
प्रतिक्रिया