ताप्लेजुङ । ताप्लेजुङमा प्रतिबन्धित लागू औषध खैरो हेरोइन सहित दुई जना पक्राउ परेका छन् । मेची राजमार्ग स्थित मेवाखा चेक पोस्टमा आवत जावत गर्ने सवारी साधन तथा मानिस चेक गर्ने क्रममा उक्त लागू औषध सहित उनीहरु पक्राउ परेका हुन् ।
पक्राउ पर्नेमा फुङलिङ नगरपालिका वडा नं. ३ निवासी ३१ वर्षीय सुभाष चन्द्र दाहाल र सोही निवासी २५ वर्षीय योगेश भारती रहेको जिल्ला प्रहरी कार्यलय ताप्लेजुङका सूचना अधिकारी कमल कुमार लुङ्गेलीले जानकारी दिनुभएको छ ।
उहाँका अनुसार पाँचथरबाट प्र.१-०३-००१ प ३२६१ नम्बरको स्कुटरमा सवार भई उनीहरु ताप्लेजुङ तर्फ आईरहेका थिए । शंका लागेर नियन्त्रणमा लिई खानतलास गर्दा योगेश भारतीको साथबाट लुकाई छिपाई बोकेको अवस्थामा लागू औषध खैरो हेरोइन जस्तो देखिने पदार्थ ४ ग्राम ४० मिलिग्राम फेला परेको छ ।
उक्त लागू औषध जस्तो पदार्थ र स्कुटर बरामद गरी उनीहरूलाई पक्राउ गरी हिरासतमा राखी अनुसन्धान भइरहेको प्रहरीले जनाएको छ ।
प्रतिक्रिया