पाथिभरा क्षेत्रमा लैजाँदै गरेको मदिरा प्रहरीको नियन्त्रणमा 

ताप्लेजुङ । ताप्लेजुङको पवित्र धार्मिक स्थल पाथिभरा मन्दिर क्षेत्रमा लैजाँदै गरेको मदिरा नियन्त्रणमा लिइएको छ । सदरमुकाम फुङलिङ बजारबाट निषेधित क्षेत्र पाथिभरा मन्दिर क्षेत्रमा लैजाँदै गरेको अवस्थामा उक्त मदिरा जन्य पदार्थ नियन्त्रणमा लिइएको हो ।   

आज दिउसो फुङलिङ नगरपालिका–९ देउरालीमा जिप्रका ताप्लेजुङबाट खटिएको प्रहरी टोलीले विभिन्न सवारी साधनहरू चेकिङ गर्ने क्रममा १ काटुन खुकुरी रम (मदिरा जन्य पदार्थ) फेला पारी नियन्त्रणमा लिइएको जिल्ला प्रहरी कार्यालय ताप्लेजुङका प्रहरी निरीक्षक, प्रहरी प्रवक्ता तथा सूचना अधिकारी कमल कुमार लुङगेलीले जानकारी दिनुभएको छ ।  

पाथिभरा मन्दिरमा आउने तीर्थयात्रीहरूको स्वास्थ्यलाई मध्यनजर गर्दै पाथिभरा क्षेत्र विकास समितिले केही समय अघि मात्र मदिरा जन्य पदार्थ बिक्री वितरण निषेध गर्ने निर्णय गरेको थियो ।