ताप्लेजुङ । पाथीभरा बहुमुखी क्याम्पसको स्नातक तहमा अध्ययनरत फक्ताङलुङ गाउँपालिकाका बिद्यार्थीहरुको शुल्क पालिकाले व्यहोर्ने भएको छ ।
स्नातक तहमा अध्ययनरत फक्ताङलुङ गाउँपालिकाका बिद्यार्थीहरुको सम्पुर्ण शुल्क पालिकाकाले व्यहोर्ने गरी मंगलबार आज सम्झौता भएको क्याम्पस प्रमुख सजन पौडेलले जानकारी दिनुभयो । उहाँका अनुसार स्वतन्त्र विद्यार्थी युनियन ९स्ववियु०को कार्यालय व्यवस्थापनको लागि १ थान कम्प्युटर र प्रिन्टर समेत उपलब्ध गराउने सम्झौता भएको छ ।
क्याम्पसमा हाल स्नातक तहमा अध्ययनका लागि १ सय २८ जनाले आवेदन फाराम भरेको क्याम्पस प्रमुख पौडेल जानकारी दिनुभयो । पहिलो पटक स्नातक तहमा अध्ययनरत बिद्यार्थीको तथ्याङ्क संकलन गरी सम्पुर्ण शुल्क पालिकाले व्यहोर्ने गरी सम्झौता गरिएको र स्नाकोत्तर तहका लागि समेत चाँडै प्रक्रिया अगाडि बढाईने पालिकाले जनाएको छ ।
क्याम्पस प्रमुख पौडेलका अनुसार हाल क्याम्पसमा अध्ययनरत फक्ताङलुङ गाउँपालिकाका १ सय ७८ जना बिद्यार्थी रहेका छन् । स्थानीय सरकारले नै उच्च शिक्षा अध्ययनको लागि व्यवस्था गरेको यो देशमै पहिलो पटक भएको समेत क्याम्पस प्रमुख पौडेलले बताउनुभयो ।
यसअघि नाल्बुले समेत आफ्ना वडाका बिद्यार्थीहरुको शुल्क वडाले भुक्तानी गर्ने गरि वडाध्यक्ष मनोज तुम्बाहाङफेले घोषणा गर्नु भएको छ । मेरिङदेन गाउँपालिकाको ६ नं. वडा नाल्बुका बिद्यार्थीहरुको शुल्क वडाले भुक्तानी गर्ने तयारी भईरहेको छ । भुक्तानीका लागि लिखित सम्झौता भने हुने बाँकी रहेको क्याम्पस प्रमुख पौडलेको भनाई छ ।
प्रतिक्रिया