फागुनमा गणना गरिएको पाथीभरा मन्दिरको भेटी सार्वजनिक

ताप्लेजुङ । पाथीभरा क्षेत्र विकास समितिले फागुन महिनामा गणना गरिएको भेटी रकम सार्वजनिक गरेको छ । पाथीभरा मन्दिरमा दर्शनार्थीले चढाएको भेटी संकलन गरी फागुन महिनामा गणना गरिएको रकम बुधबार सार्वजनिक गरिएको हो । 

गत फागुन १ गतेदेखि मसान्तसम्ममा कुल ५५ लाख ७० हजार ८८० रुपैयाँ गणना गरि विभिन्न बैंकमा जम्मा गरेर विवरण सार्वजनिक गरिएको क्षेत्र विकास समितिका कार्यकारी निर्देशक प्रजिन हाङबाङले जानकारी दिनुभयो । कार्यकारी निर्देशक हाङबाङले हरेक महिना भेटी सार्वजनिक गर्ने प्रतिबद्धता अनुसार नै फागुन महिनाको विवरण सार्वजनिक गरिएको हो । 

यस्तै पछिल्लो एक महिनामा स्वदेशी तथा विदेशी गरी १७ हजार ९ सय १२ जना तीर्थयात्री पाथीभरा मन्दिरमा पुगेको तथ्यांक समेत समितिले सार्वजनिक गरेको छ । यसैबीच पाथीभरामा संकलन भएको सुनचाँदी लिलाम बिक्री प्रकृयामा रहेको समितिले जनाएको छ । 

रिफाइन गरिएको १७८ तोला ८२ लाल सुन र ५ हजार २९८ तोला १२ लाल चाँदी बिक्रीको प्रकृयामा रहेको बताईएको छ । गत फागुन २० गते लिलाम बिक्रीको सूचना निकालिएको र बिक्री प्रकृयामा नै रहेको समितिले जनाएको छ ।