पाँचथर । जारी प्रथम किराँत गोल्डकपमा दार्जिलिङ युनाइटेड फुटबल क्लब फराकिलो गोल अन्तरले पराजित भएको छ । फिदिम माविको खेलमैदानमा आज भएको खेलमा मोरङको डाँगीहाट फुटबल क्लब सँग ६-३ गोल अन्तरले पराजित हुँदै अन्तराष्ट्रिय पाहुना टोलीको सेमिफाइनल यात्रा टुंगिएको हो ।
खेलको ८ औं मिनेटमा अरुण लिम्बुको पासमा उमेश राईले सहजै गोल गर्दै मोरङ अग्रता दिलाए । ३९ औं मिनेटमा सुजन धिमालले गोल गरेर अग्रता दोब्बर बनाएका थिए । पहिलो हाफको इन्जुरी समयमा मोरङका अरुण लिम्बुले गोल गरे ।
खेलको ४७औं मिनेटमा मोरङका सुजनले व्यक्तिगत दोश्रो र टिमको लागी चौथो गरे । ५१ औं मिनेटमा अभिशेष लिक्बुले मोरङको लागी पाँचौ गोल गरे । ५३ औं मिनेटमा पाहुना टोली दार्जिलिङका रोहित थापाले गोल गर्दै दार्जिलिङ खेलमा फकाउने प्रयास गरे । ५७ औं मिनेटमा दार्जिलिङ आशिष राईले गोल गर्दै पुःन खेलमा फर्किने संकेत गरे । ६१ औं मिनेटमा मोरङका अभिशेक लिक्बुले पुःन गोल गर्दै मोरङलाई फराकिलो जित दिलाए । ७४ औं मिनेट दार्जिलिङका गणेश लिम्बुले गोल गरे पनि जितको लागी पर्याप्त भएन ।
म्यान अफ दी म्याच मोरङका अभिशेष लिम्बु बनेका छन् । उनले ५ हजार रुपैयाँ प्राप्त गरेका छन् । जितसँगै मोरङले सेमिफाइनलमा आयोजक पाँचथर फुटबल क्लब सँगको भेट पक्का गरेको छ ।
भोलि कर्ण सिं सोनाम स्मृति क्लब ताप्लेजुङ र हिमालयन शेर्पा क्लब काठमाडौं बिच प्रतिस्पर्धा हुदैँ छ । प्रतियोगिताको विजेताले चार लाख चार हजार चार सय ४४ रुपैयाँ र उपविजेता टिमले दुई लाख दुई हजार दुई सय २२ रुपैयाँ प्राप्त गर्नेछन् । खेलको फाइनल २३ गते हुने आयोजकले जनाएको छ ।
प्रतिक्रिया