थुलुङ दुधकोशी गाउँपालिकामा सिलाम साक्मा बुनाइ तालिम सुरु

सोलुखुम्बु । थुलुङ दुधकोशी गाउँपालिकामा सात दिने फुर्का, धजुरा र सिलाम साक्मा बुनाइ तालिम सुरु भएको छ । गाउँपालिकाको आयोजनामा सञ्चालन भएको तालिममा पालिका भित्रका ४० जनाको सहभागीता रहेको छ ।

तालिमको गाउँपालिका उपाध्यक्ष सविता राईले शनिबार उद्घाटन गर्नुभयो । तालिमको उद्घाटन गर्दै उपाध्यक्ष सविता राईले तालिममा सिकेको सीपलाई व्यवसायीक रुपमा प्रयोग गरि आय आर्जनमा जुट्न आग्रह गर्नुभयो । स्थानीय उत्पादनलाई जोड दिने गाउँपालिकाको नीति अनुसार भौतिक पुर्वधार निर्माणसँगै सामाजिक विकासका कार्यक्रमलाई पनि उत्तिकै महत्त्वका साथ सञ्चालन गरिरहेको भन्दै बढी भन्दा बढी लाभ लिनको लागि उहाँले आग्रह गर्नुभयो ।

यस्तै गाउँपालिका प्रवक्ता भोजराज कार्कीले सीपले हरेक व्यक्तिलाई आत्मनिर्भर बन्न सहयोग गर्ने भन्दै सिकेको सीपलाई व्यवहारमा प्रयोग गरि आय आर्जन वृद्धि गर्न अनुरोध गर्नुभयो । गाउँपालिका केन्द्रमा सञ्चालित उक्त तालिमको सहजीकरण अरुणादेवी राई, कल्पना राई र गृष्मा राईले गरिरहनुभएको छ ।