ताप्लेजुङ, कात्तिक १३ गते । ताप्लेजुङको पाथीभरा याङ्वरक गाउँपालिकामा सम्पन्न आमन्त्रित खुला क्लबस्तरीय पुरुष फुटबल प्रतियोगिताको उपाधि पाँचथरको दरिम्बा फुटबल क्लबले जितेको छ ।
सनलाइट युनाइटेड युथ क्लबको आयोजनामा बिहीबार सम्पन्न फाइनल खेलमा झापाको आदर्श मैदान एकेडेमीलाई २–० गोल अन्तरले पराजित गर्दै दरिम्बाले उपाधि हात पारेको हो ।
उपाधिसँगै दरिम्बाले एक लाख दुई हजार ८३ रुपियाँ नगदसहित ट्रफी, मेडल र प्रमाणपत्र प्राप्त गरेको खेल संयोजक तेजवीर मेन्याङ्बोले जानकारी दिनुभयो । उपविजेता आदर्श मैदान एकेडेमीले ५० हजार रुपियाँ नगदसहित ट्रफी, मेडल र प्रमाणपत्र प्राप्त गरेको छ ।
दरिम्बाले सेमिफाइनलमा ताप्लेजुङको दोखु युवा क्लबलाई तथा आदर्श मैदान एकेडेमीले सिनामको तेल्लोक स्पोर्टिङ क्लबलाई पराजित गर्दै फाइनलमा स्थान बनाएका थिए ।
यसैगरी, महिलातर्फको उपाधि पाँचथरको लालिगुराँस फुटबल क्लबले जितेको छ । फाइनलमा ताप्लेजुङको हिमालय शेर्पा युथ क्लबलाई ३–० गोल अन्तरले पराजित गर्दै लालिगुराँसले उपाधि जितेको हो ।
महिलातर्फ विजेता लालिगुराँसले ४१ हजार रुपियाँ नगदसहित ट्रफी, मेडल र प्रमाणपत्र प्राप्त गरेको छ । उपविजेता हिमालय शेर्पाले २१ हजार रुपियाँ नगदसहित ट्रफी, मेडल र प्रमाणपत्र प्राप्त गरेको क्लबका अध्यक्ष केशव पौडेलले जानकारी दिनुभयो ।
पाथीभरा याङ्वरक गाउँपालिकाको प्रशासकीय केन्द्र थेचम्बुमा कात्तिक ७ गतेदेखि सुरु भएको प्रतियोगितामा पुरुषतर्फ ११ र महिलातर्फ पाँच टोली सहभागी थिए । दसैँ–तिहारको अवसर पारेर आयोजना गरिएको प्रतियोगिता बिहीबार सम्पन्न भएको हो ।
प्रतिक्रिया