ताप्लेजुङ, असार १४ गते । ताप्लेजुङको पाथीभरा याङवरक गाउँपालिकामा आल्मुनियमको काम गर्ने एक व्यक्तिमाथि कुटपिट गरेको आरोपमा एक जनालाई पक्राउ गरिएको छ ।
पाथीभरा याङवरक गाउँपालिका–२, थेचम्बुस्थित सार्वजनिक स्थानमा गत असार ९ गते साँझ आल्मुनियमको काम गर्ने विकास लामामाथि कुटपिट भएको घटनामा संलग्न रहेको आरोपमा सोही स्थानका ४० वर्षीय तेजवीर सुब्बालाई पक्राउ गरिएको हो ।
घटनापछि फरार रहेका सुब्बालाई प्रहरीले पक्राउ गरी घटनाबारे आवश्यक अनुसन्धान अघि बढाएको जिल्ला प्रहरी कार्यालय ताप्लेजुङका सूचना अधिकारी तथा प्रहरी निरीक्षक जटाशङ्कर यादवले जानकारी दिनुभयो । पक्राउ परेका सुब्बामाथी कानुनी प्रक्रिया अगाडि बढाइएको र घटनाका सबै पक्षबारे थप अनुसन्धान भइरहेको प्रहरी निरीक्षक यादवको भनाई छ ।
कुटपिट भएको भिडियो सामाजिक सञ्जालबाट बाहिरिएपछि जिल्ला प्रहरी कार्यालयले छानबिन समिति समेट गठन गरेको थियो । कार्यालय प्रमुख प्रहरी नायब उपरीक्षक उमेश जोशीका अनुसार प्रहरी निरीक्षक जटाशङ्कर यादवको संयोजकत्वमा तीन सदस्यीय छानबिन समिति गठन गरिएको थियो ।
भिडियोमा एक व्यक्तिमाथि बाँधेर निर्घात कुटपिट गरेको देखिएको छ । यसमा अरु धेरैजनाको आवाज पनि सुनिन्छ ।
प्रतिक्रिया