ताप्लेजुङ, असार ११ गते । ताप्लेजुङको मिक्वाखोला गाउँपालिकाले ४६ करोड ३३ लाख ६७५ रुपियाँ बजेट सार्वजनिक गरेको छ । गाउँपालिका अध्यक्ष भक्त कार्कीको अनुमतिमा उपाध्यक्ष डण्डु लामाले गाउँसभाको बजेट अधिवेशन मार्फत उक्त बजेट प्रस्तुत गर्नुभएको हो ।
उपाध्यक्ष लामाले प्रस्तुत गर्नुभएको बजेटमध्ये सङ्घीय समानीकरण अनुदानमा १० करोड ७ लाख, सङ्घीय सशर्त अनुदानतर्फ १४ करोड २६ लाख, सङ्घीय विषेश अनुदानतर्फ ७९ लाख, समपूरक अनुदानतर्फ १ करोड ७४ लाख र सङ्घीय राजश्व बाँडफाँडतर्फ ९ करोड ४२ लाख ३८ हजार रुपियाँ रहेको छ ।
यस्तै प्रदेश समानीकरण अनुदानतर्फ ८२ लाख ६४ हजार, प्रदेश सशर्त अनुदानतर्फ ६ करोड ४३ लाख ६० हजार, प्रदेश समपूरक अनुदानतर्फ एक करोड ६० लाख र प्रदेश राजश्व बाडँफाँडतर्फ ७४ लाख २७ हजार ६७५ रुपियाँ रहेको छ ।
त्यस्तै गाउँपालिकाको आन्तरिक स्रोत तर्फ ४५ लाख रुपियाँ रहेको छ । गाउँपालिकाले पूर्वाधार क्षेत्रलाई प्राथमिकता दिएको छ । यो सँगै पालिकाले कृषि पर्यटन र जल विद्युतको उपयोग गर्दै अर्थतन्त्रको विकासमा जोड दिने भएको छ ।
साथै स्थानीय व्यावसायिकता प्रर्वद्धन मार्फत गरिबी न्यूनिकरण गरी दिगो समावेशी र प्रविधि मैत्री सुशासन प्रर्वद्धन गर्ने जनाएको छ ।
प्रतिक्रिया