ताप्लेजुङ, चैत २६ गते । पाथीभरामा दर्शनार्थीले चढाएको सुनचाँदी प्रशोधन (रिफाइन) गरिएको छ । करिब दुई वर्षको अवधिसम्म पाथीभरामा भक्तजनले चढाएको सुन तथा चाँदी रिफाइन गरिएको हो ।
पाथीभरा मन्दिरको रेखदेख तथा संरक्षणका लागि नेपाल सरकारद्वारा गठन भएको पाथीभरा क्षेत्र विकास समितिले सुन तथा चाँदी प्रशोधन गरेको छ । समितिका जिन्सी शाखा प्रमुख इन्द्र पौडेलका अनुसार वि. सं. २०८० साल पुष २५ गतेदेखि २०८२ साल फागुन २५ गते सम्म मन्दिरमा चढाइएको सुनचाँदी सङ्कलन गरि रिफाइन गरिएको हो । जिल्लामा रहेको सुनचाँदी व्यवसायीहरूको संस्था पाथीभरा सुनचाँदी कला व्यवसायी सङ्घको प्राविधिक सहयोगमा रिफाइन गरिएको समितिले जनाएको छ ।
करिब २६ महिनाको अवधिमा सङ्कलन भएको ६७ तोला सुन र ४३ केजी चाँदी रिफाइन गरिएको समितिका सूचना अधिकारी नवीन निरौलाले जानकारी दिनुभयो । ६७ तोला सुनलाई प्रशोधन गर्दा ५० तोला ८५ लाल तौल बराबरको चौबीस क्यारेट (एक नम्बरी) बनेको समितिको सुनचाँदी व्यवस्थापन उपसमितिका संयोजक चेतराज घिमिरेले बताउनुभयो । उहाँका अनुसार करिब ४३ किलोग्राम चाँदी रिफाइन गर्दा दुई हजार ५४ तोला ३५ लाल तौल बराबरको चौबीस क्यारेट चाँदी बनेको छ ।
यसअघि नै रिफाइन भएको एक सय ७८ तोला ८२ लाल सुन समितिले भण्डार गरि राखेको छ । जुन सुन लिलामीका लागि पाँचौँ पटक सूचना जारी गर्दा समेत कसैको आवेदन नपरेको समितिले जनाएको छ । पाँच हजार दुई सय ९८ तोला १२ लाल चाँदी भने चौथो पटक सूचना जारी गर्दा लिलामी भएको समितिका कार्यकारी निर्देशक प्रजिन हाङबाङले जानकारी दिनुभयो । उहाँका अनुसार गत पुष २९ गते प्रतितोला चार हजार तीन सय रुपियाँको दरले चाँदी लिलामी भएको छ । लिलामीबाट समितिलाई प्राप्त भएको रकम पाथीभरा मन्दिरको विकास तथा संरक्षणको निम्ति खर्च गर्ने योजना रहेको उहाँको भनाइ छ ।
जिन्सी शाखा प्रमुख पौडेलका अनुसार पुरानो र तत्काल रिफाइन गरिएको जम्मा दुई सय २९ तोला ६७ लाल सुन र दुई हजार ५४ तोला ३५ लाल चाँदी समितिले विभिन्न सरोकारवालाको रोहबरमा सिलबन्दी गरि भण्डारण गरेको छ । त्यस्तै दर्शनार्थीले मन्दिरमा चढाएको त्रिशूल, घण्टी, तामा समेत गोदाममा भण्डारण गरि राखिएको जनाइएको छ ।
भण्डारणमा रहेका सुनचाँदी लिलामीका लागि नयाँ कार्यविधि तयार गरि तत्काल बिक्री वितरण गर्ने तयारी भइरहेको कार्यकारी निर्देशक हाङबाङको भनाइ रहेको छ । पछिल्लो समयमा सुनको भाउमा भइरहेको उत्तारचढावका कारण पटकपटक सूचना जारी गर्दा समेत लिलामी हुन नसकेकाले थप कार्यविधि तयार पार्ने योजना समितिसँग रहेको हाङबाङले बताउनुभयो ।
प्रतिक्रिया