ताप्लेजुङमा सोनाम ल्होछार भब्यताका साथ मनाईयो

ताप्लेजुङ । ताप्लेजुङमा २८६२ औँ सोनाम ल्होछार भब्यताका साथ मनाईएको छ । सोमबार नेपाल तामाङ घेदुङ जिल्ला समन्वय समिती र नगर कार्य समिती ताप्लेजुङको संयुक्त आयोजनामा सोनाम ल्होछार २०८२ भब्यताका साथ मनाईएको हो ।
तामाङ समुदायले हरेक वर्ष माघ शुक्ल प्रतिपदाका दिन मनाउने सोनाम ल्होछार ताप्लेजुङमा ¥याली सहित शुभकामना आदानप्रदान गरि मनाईएको हो । कार्यक्रममा जिल्ला समन्वय समिती प्रमुख छिरिङ लामा, फुङलिङ नगरपालिका उपप्रमुख भिमा देवी ओझा, प्रमुख जिल्ला अधिकारी शिवराज शेढाई लगायत विभिन्न जातिय संस्थाका प्रतिनीधिले शुमकामना व्यक्त गर्नुभयो ।

मञ्जुश्री पात्रो अनुसार आजदेखि २८६२ औँ वर्ष शुरू भएको छ । आजदेखि सर्प वर्ष पूरा गरी घोडा वर्ष प्रवेश हुन्छ । मुसा, गाई, बाघ, खरायो, ड्रागन (मेघ), सर्प, घोडा, भेडा, बाँदर, चरा, कुकुर र सुँगुर गरी १२ वर्गमा सोनाम ल्होसारलाई विभाजन गरिएको छ । झन्डै ४ हजार ७ सय वर्ष पुरानो मानिने यो परम्परा नेपालसहित चीन, मंगोलिया, जापान, भियतनाम, थाइल्यान्ड, ताइवान, मलेसिया, सिंगापुरलगायत देशहरूमा पनि मनाउने गरिन्छ ।