ताप्लेजुङ, मंसिर १ गते । फुङलिङ नगरपालिकाले आज स्थानीय बिदा दिएको छ । लिम्बूहरूको महान पर्व चासोक तङ्नामको पावन अवसरमा स्थानीय बिदा दिएको हो ।
नगरपालिकाले एक विज्ञप्ति जारी गर्दै मिति २०८२ कात्तिक ३० गतेको ७६ औं कार्यपालिका बैठकको निर्णय अनुसार याक्थुङ चुम्लुङ धर्मावलम्बीहरूको महान चाड चासोक तङ्नामको पावन अवसरमा मिति २०८२ साल मंसिर १ गते सोमबारका दिन स्थानीय बिदा दिएको जानकारी गराएको छ ।
यो सँगै नगरपालिकाको कार्यालय मातहतका वडा कार्यालयहरू र शिक्षण संस्थाहरू बन्द हुने भएको छ । स्वास्थ्य संस्थाहरूबाट प्रदान गरिने अति आवश्यक बाहेकका अन्य सेवाहरू पनि बन्द रहने नगरपालिकाले जनाएको छ ।
यस्तै आज याक्थुङ चुम्लुङ ताप्लेजुङको आयोजनामा चासोक तङ्नाम न्वागी पूजाको अवसर पारेर विविध कार्यक्रम हुने चुम्लुङका अध्यक्ष हाङमाया लेक्षर्बोले जानकारी दिनुभएको छ । उहाँका अनुसार होटल जान्नु इनमा राष्ट्र तथा अन्तराष्ट्रिय साथै स्थानीय कलाकारहरूको साथमा साँगीतिक कार्यक्रम पनि हुने छ ।
प्रतिक्रिया