नेपाली कम्युनिष्ट पार्टीले सातै प्रदेशमा ‘एकता सन्देश सभा’ गर्दै

काठमाडौँ । हालै गठन भएको नेपाली कम्युनिष्ट पार्टीले सातै प्रदेशमा ‘एकता सन्देश सभा’ सञ्चालन गर्ने निर्णय गरेको छ । पार्टी मुख्यालय पेरिसडाँडामा शनिबार बसेको बैठकले आगामी निर्वाचन तयारीलाई व्यवस्थित र प्रभावकारी अभियानका रूपमा अघि बढाउने निर्णय गरेको हो ।

पार्टीका संयोजक पुष्पकमल दाहालको अध्यक्षतामा बसेको बैठकले जनवर्गीय संगठन, मोर्चा तथा सहायक संगठनहरूलाई सम्बन्धित तहका पार्टी संरचनासँग समन्वय गर्दै जनपरिचालनमा सक्रिय हुन निर्देशन दिएको छ, प्रवक्ता अग्निप्रसाद सापकोटाले जानकारी दिए ।

यसअघि नेकपा (माओवादी- केन्द्र), नेकपा (एकीकृत समाजवादी) सहित विभिन्न १० कम्युनिष्ट पार्टीहरूले कात्तिक १९ गते ‘एकता राष्ट्रिय सम्मेलन’ गरी नयाँ दल, नेपाली कम्युनिष्ट पार्टी गठन गरेका थिए ।