ताप्लेजुङ, कात्तिक २२ गते । ताप्लेजुङमा विश्व विख्यात नेत्र रोग विशेषज्ञ डाक्टर सन्दुक रुइतको उपस्थितिमा निशुल्क आँखा शिविर सञ्चालन हुने भएको छ । यही कात्तिक ३० गते देखि मंसिर २ गते सम्म फुङलिङको डिचेन डोङ्गला स्मारक आँखा उपचार केन्द्रमा शिविर सञ्चालन हुने भएको हो ।
डिचेन डोङ्गला स्मारक आँखा उपचार केन्द्र र फुङलिङ नगरपालिकाको आयोजना साथै तिलगङ्गा आँखा प्रतिष्ठान काठमाडौंको प्राविधिक सहयोगमा शिविर सञ्चालन हुन लागेको डिचेन डोङ्गला स्मारक आँखा उपचार केन्द्रका क्लिनिक इन्चार्ज तथा वरिष्ठ नेत्र अधिकृत काजी गुरुङले जानकारी दिनुभएको छ ।
यस्तै नेपाल नेत्र ज्योति सङ्घ, रुइत फाउण्डेसन काठमाडौँ र सेवा फाउण्डेसनको समेत सहकार्य रहने गुरुङको भनाई छ । शल्यक्रिया सहितको निःशुल्क आँखा शिविरमा विश्व विख्यात डाक्टर सन्दुक रुइतको परिवारनै खटिने भएको छ ।
श्रीमती नन्दा र छोरा सागर सहितको चिकित्सक तथा आँखा प्राविधिकहरूको टोली शिविरमा खटिने गुरुङले बताउनुभयो । ताप्लेजुङको फक्ताङलुङ गाउँपालिका वडा नं. ७ ओलाङचुङगोलामा जन्मिनु भएका रुइत राष्ट्रिय अन्तराष्ट्रिय क्षेत्रमा ख्यातिप्राप्त आँखा रोग विशेषज्ञ हुनुहुन्छ ।
प्रतिक्रिया