महिलालाई उद्यमी बनाउन गलैँचा बुन्ने तालिम

ताप्लेजुङ, असोज ५ गते । ताप्लेजुङमा एक महिने गलैँचा बुन्ने तालिम सुरु भएको छ । तालिम हिमाली संरक्षण मञ्च ताप्लेजुङ र रेड पान्डा नेटवर्कको साझेदारीमा सुरु भएको हो ।

६ लाख ७० हजार बढीको लागतमा तालिम सुरु गरिएको हिमाली संरक्षण मञ्चका कार्यक्रम संयोजक रमेश राईले बताउनुभयो । उहाँका अनुसार गत भदौ २३ गतेबाट सुरु भएको तालिम असोज २४ गते सम्म जारी रहनेछ । रेडपान्डा ९हाब्रे०को प्रचार, संरक्षण तथा रेडपान्डाको बासस्थान रहेको क्षेत्रका महिलाहरूको आम्दानी बढाउने तालिम प्रदान गरिएको मञ्चले जनाएको छ ।

तालिममा जिल्लाका विभिन्न स्थानका १० जना महिलाको सहभागिता रहेको छ । गलैँचामा दुर्लभ बन्यजन्तु रेडपान्डा अङ्कित लोगो समावेश गरि तयार पारिदैछ । जसले हाब्रेको पहिचान जोगाउन तथा प्रचारमा ल्याउन मदत पुर्याउने मञ्चको विश्वास छ ।

तालिमको सहजीकरण गलैँचा बुनेर लामो समय सम्म अनुभव समेट्नु भएका दावाफुटी शेर्पाले गरिरहनु भएको छ । चालू आर्थिक वर्षमा मञ्चले ताप्लेजुङमा रेडपान्डा संरक्षणका लागि करिब डेढ करोड रुपियाँ लगानी गर्दै छ ।

नौ ओटा स्थानीय तह रहेको ताप्लेजुङमा आठराई त्रिवेणी गाउँपालिका बाहेक अरु सबै क्षेत्रमा रेडपान्डाको बासस्थान रहेकाले ती स्थानमा मञ्चले कार्यक्रम गरि रहेको छ ।