ताप्लेजुङ, भदौ २७ गते । ताप्लेजुङमा कफ्र्यू लम्बिएको छ । जिल्लाको शान्ति सुरक्षाको अवस्था मध्यनजर गर्दै कफ्र्यू लम्बिएको हो ।
प्रमुख जिल्ला अधिकारी शिवराज सेढाइँले शुक्रबार एक सूचना प्रकाशित गर्दै शनिबार बिहान ६ बजे सम्म लागू हुनेगरि कफ्र्यू आदेश जारी गर्नुभएको छ । प्रजिअ सेढाइँले जारी गर्नुभएको सूचना अनुसार जिल्लाभर कफ्र्यू लागू हुने छ ।
जिल्लाको पूर्वमा मित्रराष्ट्र भारतको सिमानाबाट पश्चिम, पश्चिममा सङ्खुवासभा जिल्लाको सिमानाबाट पूर्व, उत्तरमा मित्रराष्ट्र चीन तिब्बतको सिमानाबाट दक्षिण र दक्षिणमा तेह्रथुम साथै पाँचथर जिल्लाको सिमानाबाट उत्तर तर्फको चार किल्ला भित्रको क्षेत्र भरि लागू हुने गरी कफ्र्यू आदेश जारी गरिएको छ ।
कफ्र्यू लागू पछि कोही पनि आवतजावत गर्न, भेला, जुलुस, प्रदर्शन, सभा, बैठक एवम् घेराउ गर्न नपाइने प्रकाशित सूचनामा उल्लेख गरिएको छ । कफ्र्यू आदेशको उल्लङ्घन गर्ने तथा पालना नगर्नेलाई कानून बमोजिम कारवाही हुने हुने समेत जनाइएको छ ।
कर्फ्युको अवधिमा एम्बुलेन्स, बारुणयन्त्र, शवबाहन, स्वास्थ्यकर्मी, सञ्चारकर्मी, मानवअधिकारकर्मी र कूटनीतिक नियोगका व्यक्तिले भने आवतजावत गर्न सवारी साधन प्रयोग गर्न पाउने छन् । उक्त सुविधाका लागि सेवासँग सम्बन्धित परिचयपत्र वा अन्य कागजात हुनुपर्ने र आउजाउ गर्न सुरक्षाकर्मीबाट सहजीकरण हुने पनि सूचनामा उल्लेख गरिएको छ ।
शुक्रबार बिहान १० बजेदेखि साँझ ५ बजेसम्म भने जिल्लामा निषेधाज्ञा जारी गरिएको थियो ।
प्रतिक्रिया